Səudiyyə Ərəbistanından Suriyaya yeni enerji göndərişi
Suriya Rəsmi Xəbər Agentliyi SANA bu gün Səudiyyə Ərəbistanından göndərilmiş böyük həcmli enerji yardımının Baniyas limanına çatdığını açıqlayıb. Məlumata əsasən, 90 min ton xam neft daşıyan Səudiyyə tankeri ölkənin enerji tələbatını qarşılamaq və yerli neft emalı müəssisələrinin fəaliyyətini dəstəkləmək məqsədilə Suriyaya göndərilib.
Suriya Neft Şirkətinin icraçı sədrinin müavini Əhməd Qəbəci bildirib ki, Baniyas bu gün Səudiyyənin təqdim etdiyi enerji hibəsinin ilk hissəsini qəbul edib. Bu mərhələnin 650 min barrel həcmində olduğu açıqlanıb. O, ikinci göndərişin — təxminən 1 milyon barrel xam neftin — ayın 23-də limana çatacağını və bütün partiyaların Baniyas Neft Emalı Zavodunda emal ediləcəyini qeyd edib.
Texniki heyət tam hazırdır
Baniyas Neft Terminalının direktoru Əbdulhadi Cubasi qeyd edib ki, tankerin boşaldılması üçün təqribən 72 saata ehtiyac var. O, yüksək ixtisaslı heyətin hər cür texniki hazırlığa malik olduğunu və istənilən növ gəmilərin qarşılanmasına hazır olduqlarını bildirib.
Suriya Liman və Sərhəd Keçid Məntəqələri Baş İdarəsinin rəsmisi Mazin Aluş da bəyan edib ki, liman “PETALIDI” adlı tankeri qəbul edib və boşaltma prosesi ən yüksək texniki və ekoloji təhlükəsizlik standartları çərçivəsində aparılır. Xam neftin Baniyas zavoduna ötürülməsi ilə yerli yanacaq bazarının sabitliyinin gücləndirilməsi hədəflənir.
Enerji əməkdaşlığında yeni mərhələ
Suriya və Səudiyyə Ərəbistanı arasında imzalanan memorandum çərçivəsində Riyad ümumilikdə 1 milyon 650 min barrel xam nefti Suriya tərəfinə hibe olaraq təqdim edir. Bu gün limana çatan tanker isə razılaşmanın ilk praktik nəticəsi kimi qiymətləndirilir.
Bu addımın Suriyanın enerji sektorunda sabitliyə, həmçinin daxili bazarda yanacaq təminatının güclənməsinə mühüm təsir göstərəcəyi gözlənilir.
