Şeyx Hasinaya qarşı tarixi hökm
Banqladeşdə səs-küylü məhkəmə prosesi ilə müşayiət olunan işdə ölkənin keçmiş baş naziri Şeyx Hasina insanlığa qarşı cinayətlərdə təqsirli bilinərək ölüm cəzasına məhkum olunub. Hökm bu gün Dəkkədə izdihamla dolu məhkəmə zalında elan edilib.
Hakim Qulam Murtuza Mozumder hökmü oxuyarkən bildirib ki, Hasina üç maddə üzrə – qətllərə təhrik, zorakılıq əmrlərinin verilməsi və baş verən vəhşiliklərin qarşısını almamaq – üzrə təqsirli sayılıb. Məhkəmə yekun olaraq ona bir cəza – ölüm hökmü verib.
Uzunmüddətli məhkəmə və tələbə üsyanı
Bir neçə ay davam edən məhkəmə prosesində ittiham tərəfi Hasinanın ötən il baş vermiş genişmiqyaslı tələbə üsyanının zorakı şəkildə yatırılmasına şəxsən göstəriş verdiyini iddia edib. Hökmə əsasən, həmin əmrlər nəticəsində insanlığa qarşı cinayətlər törədilib.
Qeyd edək ki, Şeyx Hasina 1990-cı illərdən bəri müxtəlif dövrlərdə Banqladeşin baş naziri vəzifəsini icra edib və ölkənin qurucu lideri Şeyx Mujibür Rəhmanın qızıdır. Onun hökuməti ötən il baş verən tələbə etirazlarını sərt güc tətbiqi ilə dağıtmaqda ittiham olunurdu.
Siyasi gərginlik fonunda verilmiş qərar
Hökümün elan olunduğu dövrdə Banqladeşdə siyasi parçalanma daha da dərinləşib. Cəmiyyətin bir hissəsi Hasinanı ölkənin sabitliyi üçün mühüm siyasi fiqur hesab edərkən, rəqibləri onun insan hüquqlarının pozulması ilə bağlı addımlarını illərdir tənqid edir.
Bu hökm ölkədə həm siyasi dairələrdə, həm də ictimaiyyətdə kəskin reaksiyalara səbəb olub və növbəti günlərdə ölkədə gərginliyin arta biləcəyi ehtimal edilir.
