Yeni xarici tələbə qəbulu kəskin şəkildə düşüb
ABŞ-ın “New York Times” qəzeti bu payız ölkənin kollec və universitetlərində təhsil almaq üçün ilk dəfə müraciət edən xarici tələbələrin sayında ciddi azalma olduğunu açıqlayıb. Statistikaya əsasən, yeni qeydiyyatdan keçən beynəlxalq tələbələrin sayı ötən illə müqayisədə 17% aşağı düşüb.
Qəzet yazır ki, ümumi beynəlxalq tələbə sayı isə demək olar sabit qalıb – cüzi şəkildə, təxminən 1% azalma müşahidə olunub.
Azalmanın əsas səbəbi: miqrasiya siyasəti və viza məhdudiyyətləri
Məlumata görə, tələbə sayındakı geriləmə, Donald Tramp administrasiyasının xarici tələbə qəbulunu məhdudlaşdıran siyasətləri və ali təhsil sistemində aparmaq istədiyi dəyişikliklərin yaratdığı narahatlıq fonunda formalaşıb. Bu addımlar bir çox potensial tələbənin prosesdən çəkilməsinə, bəzi universitetlərin isə xüsusilə magistratura proqramlarında qəbul sayını azaltmasına səbəb olub. ABŞ universitetlərindəki beynəlxalq tələbələrin böyük hissəsi məhz magistratura tələbələridir.
Araşdırma məhdud məlumat bazasına əsaslanıb
Xəbərdə qeyd olunur ki, “New York Times”ın istinad etdiyi Beynəlxalq Təhsil İnstitutunun hesabatı ABŞ universitetlərinin dörddə birindən azını əhatə etsə də, bu müəssisələr böyük sayda beynəlxalq tələbə qəbul edən universitetlərdir.
Sorğuya daxil olan universitetlərin 57%-i yeni xarici tələbə qeydiyyatında azalma olduğunu bildirib və əsas səbəb kimi viza problemləri və səyahət məhdudiyyətlərini göstərib.
Bakalavr səviyyəsində artım, magistraturada ciddi düşüş
Hesabatda diqqət çəkən məqamlardan biri də odur ki, bakalavr pilləsində yeni xarici tələbələrin qeydiyyatı yüksəlib və pandemiya dövründə yaşanan azalmanın müəyyən qədər bərpasını göstərib. Lakin bunun əksinə olaraq, magistratura səviyyəsində yeni qeydiyyatlar 12% azalıb.
Hazırda ABŞ-da beynəlxalq tələbələrin ümumi sayı 1,2 milyon nəfərdir və bu, ölkədəki bütün tələbələrin təxminən 6%-ni təşkil edir. Xaricdən gələn tələbələrin böyük hissəsi Hindistan və Çindən olur — son il ərzində ABŞ-a bu iki ölkədən birlikdə 629 min tələbə gəlib.
Universitetlərin gəlirləri üçün risk yaranır
Beynəlxalq tələbələrin ABŞ ali təhsil sektorunda mühüm maliyyə rolu var. Qəzet bildirir ki, əvvəlki proqnozlarda yeni xarici tələbələrin sayının 40% azalacağı ehtimal edilsə də, hazırkı göstəricilər bunun daha yumşaq olduğunu göstərir. Buna baxmayaraq, 17%-lik azalmanın gələcək illərdə universitetlərin gəlir axını və beynəlxalq tələbə marağı üçün ciddi siqnal olduğu vurğulanır.
