Zöhran Məmdani Nyu-York tarixində ilk müsəlman mer oldu
Nyu-York şəhərində keçirilən seçkilərdə 34 yaşlı siyasətçi və ştat assambleyasının üzvü Zöhran Məmdani qalib gələrək ABŞ-ın ən böyük şəhərinin 111-ci meri olub. O, həmçinin bu vəzifəyə seçilən ilk müsəlman, ilk cənubi asiya əsilli və Afrikada doğulmuş şəxs kimi tarixə düşüb.
Seçkilər çərşənbə axşamı başa çatıb. Səslərin 85 faizi sayıldıqdan sonra Məmdani rəqibi — Nyu-Yorkun keçmiş qubernatoru Endryu Kuomonu ən azı 50 faiz səslə geridə qoyub.
“Yeni bir dövr başlayır”
Məmdani seçki günü jurnalistlərə açıqlamasında bildirib:
“Biz şəhərimizin tarixində dönüş nöqtəsindəyik. Köhnə siyasətə, edə bilmədiyini bəhanə edən yanaşmalara vida edirik. Yeni bir dövr başlayır.”
O əlavə edib ki, “qarşıda duran böhranların miqyasını biz seçmirik, amma ona necə cavab verəcəyimizi biz müəyyənləşdiririk.”
Demokrat siyasətçi seçki kampaniyasında kirayə qiymətlərinə nəzarət, ictimai nəqliyyatda pulsuz avtobus səfərləri və bu təşəbbüslərin maliyyələşdirilməsi üçün şəhərin ən varlı sakinlərinə əlavə vergi tətbiqi vədləri ilə çıxış edib.
İsrail–Fələstin mövqeyi və seçki uğuru
Məlumatlara görə, Məmdaninin İsrail və Fələstin məsələsindəki açıq mövqeyi onun ilkin seçkilərdə qələbəsini möhkəmləndirib. Bəzi dairələr onu antisemitizm ittihamı ilə tənqid etsələr də, o, Qəzzada gedən müharibəni “soyqırımı” adlandıraraq prinsipial mövqe sərgiləyib.
Kuomodan məğlubiyyət etirafı
Müstəqil namizəd kimi seçkilərə qatılan Endryu Kuomo səsvermə zamanı Demokratlar Partiyası daxilində “uzun müddətdir davam edən daxili qarşıdurmanın” yaşandığını bildirib:
“Solçu sosialistlər özlərini ‘mötədil demokratlara’ qarşı qoyurlar. İndi gördüyümüz də bu mübarizənin nəticəsidir.”
Kuomo axşam öz qərargahında çıxış edərək məğlubiyyətini etiraf edib:
“Bu gecə onların gecəsidir.”
Tarixi seçici fəallığı
Zöhran Məmdani 2026-cı il yanvarın 1-də 8,5 milyon əhalisi olan Nyu-York şəhərinin rəhbərliyinə rəsmi olaraq başlayacaq. Şəhər Seçki Komissiyasının məlumatına əsasən, 4,7 milyon qeydiyyatdan keçmiş seçicidən iki milyondan çoxu səs verib — bu, 1969-cu ildən bəri ən yüksək göstəricidir.
“The New York Times” qəzetinin məlumatına görə, 735 mindən çox seçici səsvermə günündən əvvəl erkən səs verib. Bu, prezident seçkiləri olmayan il üçün indiyədək qeydə alınan ən yüksək erkən səsvermə göstəricisidir.
2021-ci ildə keçirilən son mer seçkilərində cəmi 1,15 milyon seçici iştirak etmişdi. Bu ilki nəticələr Nyu-York sakinlərinin siyasi fəallığının xeyli artdığını göstərir.
