Sənadə şəhid general Ğumariyə möhtəşəm vida mərasimi
Yəmənin paytaxtı Sənədə bu gün Silahlı Qüvvələrin Baş Qərargah rəisi, şəhid general-polkovnik Məhəmməd Əbdülkərim əl-Ğumarinin vida mərasimi böyük izdihamla keçirilib. Mərasim “Sədaqət Sahiblərinə Sədaqət Günü” adlandırılan tədbir çərçivəsində Məşəl meydanında və “Əl-Şəab” məscidində baş tutub.
Vida mərasiminə minlərlə insan, dövlət rəsmiləri və hərbi nümayəndələr qatılıb. Tədbir şəhidlərə ehtiramın, həmçinin yəmənlilərin birliyinin rəmzinə çevrilib.
Müfti: Xainlərlə əməkdaşlıq edənlər dindən dönüblər
Yəmən müftisi Şəmsəddin Şərəfəddin cənazə namazına imamlıq edərək çıxışında düşmənlə – xüsusilə İsrail və ABŞ-la əməkdaşlıq edənlərin dinindən dönmüş sayıldığını bəyan edib. O, “kim xəyanət edənə sığınacaq verərsə, Allahın və mələklərin lənəti onun üzərinə olsun” ayəsini xatırladaraq, xain və satqınlara qarşı sərt tədbirlər görülməsini vacib sayıb.
Müfti qeyd edib ki, şəhidlərin qanı azad insanların yolunu işıqlandıran bir mayakdır:
“Şəhidlərin qanı azadlıq və ləyaqət yolunda mübarizə aparanlar üçün həmişə nur və ilham mənbəyi olacaq.”
O, həmçinin Ğumarinin və silahdaşlarının şəhadətini ilahi bir sınaq kimi dəyərləndirərək, Yəmənin Qəzza və Fələstinə dəstəyində dəyişməz qaldığını vurğulayıb.
Məhəmməd Müftah: “Ğumari ordunu zirvəyə yüksəltdi”
Sənə hökumətinin başçısı vəzifəsini icra edən alim Məhəmməd Müftah mərasimdə çıxış edərək bildirib:
“Biz bu gün ümmətin böyük şəxsiyyətlərindən birini, əsl mücahidi yola salırıq. Şəhid Ğumari və silahdaşları ordumuzu xalqın arzusunda olduğu səviyyəyə qaldırdılar.”
Müftah əlavə edib ki, düşmənlər birləşərək general Ğumarini hədəfə alıblar, lakin onun qanı Yəmən ordusunun iradəsini daha da gücləndirib.
Şəhidin dəfni və simvolik birlik
Cənazə namazından sonra şəhidin nəşi “Əl-Şəab” məscidindən Məşəl meydanına gətirilib, orada dövlət səviyyəsində vida mərasimi keçirilib. Daha sonra Ğumari şəhid prezident Saleh əs-Səmadın yanında dəfn olunub. Bu, şəhid rəhbərlərin bir amal uğrunda birliyinin rəmzi kimi qiymətləndirilib.
Yəmən Silahlı Qüvvələri bəyan edib ki, general Ğumari“Qüds yolunda” şəhid olub və bu hadisəyə görə İsrailin cavab verəcəyini bildirib. Onun 13 yaşlı oğlu Hüseyn və bir neçə müşayiətçisi də eyni hücum nəticəsində şəhid olublar.
Azadlıq və müqavimət yolunda şəhidlik
Mərasim iştirakçıları şəhid Ğumarinin və bütün şəhidlərin mübarək adını yad edərək, onların qanının Yəmən xalqının azadlıq iradəsini sarsıdılmadan qoruyacağına əmin olduqlarını ifadə ediblər.
