Britaniya hərbi təhsilli israilli zabitlər ifşa olundu
Britaniyada fəaliyyət göstərən “Declassified” saytı İsrail ordusunun zabitləri ilə bağlı mühüm məlumatları açıqlayıb. Sənədlərə görə, Kral Müdafiə Araşdırmaları Kollecində (RCDS) azı 32 israilli zabit təlim alıb, onların bəziləri hazırda Qəzzədə hərbi əməliyyatlarda iştirak edir.
Məlumat bazası “DDoS” (Distracted Denial of Secrets) platforması tərəfindən sızdırılıb və ilk dəfə dərc olunub. Siyahıda həmçinin Britaniyanın Oksfordşirdə yerləşən hərbi kollecində təlim keçmiş 6 israilli əsgərin adları da var. Hazırda isə 4 israilli hərbçi Böyük Britaniyada təlimlərini davam etdirir.
Qəzzədə əməliyyatlara rəhbərlik edən zabitlər
Açıqlanan siyahıya görə, hazırda İsrail ordusunun cənub komandanlığının rəhbəri olan polkovnik Yaniv Asur da Britaniyada təlim keçib. O, Qəzzədə aparılan hərbi əməliyyatlara şəxsən rəhbərlik edir. İsrailin hava qüvvələri komandanlığı isə onu çoxsaylı mülki itkilərə görə məsuliyyət daşımaqda ittiham edir.
Britaniya ilə İsrail arasında hərbi əməkdaşlıq tənqid olunur
“Declassified” yazır ki, israilli hərbçilərin Britaniyada hərbi təhsil alması Birləşmiş Krallığın Qəzzədəki müharibədə dolayı yolla iştirakına dair suallar doğurur. Bu, xüsusilə də insan haqları mövzusunda verilən təlimlərin effektivliyi barədə şübhələri gücləndirir.
Britaniya Müdafiə Nazirliyi isə açıqlayıb ki, gələn ildən etibarən israilli hərbçilərə RCDS-də təhsil almağa icazə verilməyəcək. Lakin hazırda kurs keçən 4 zabitin təhsilini tamamlamağa icazə veriləcək.
Britaniyalı general: “Utancverici qərar”
Böyük Britaniya ordusunun təqaüddə olan generalı Çarli Herbert məsələyə sərt reaksiya verərək bildirib:
“İsrail ordusu zabitlərinin kollecə qəbulunun yalnız 2026-cı ildən dayandırılması qəbuledilməzdir. Onlar dərhal çıxarılmalıdır”.
General əlavə edib ki, Britaniya hökuməti İsraillə bütün hərbi əlaqələrini kəsməlidir:
“Əks halda, bu əməkdaşlıq bizi uzun illər utanc içində saxlayacaq”.
