İran: “Nüvə sənayemiz millətimizin tarixində kök salıb”
İran Atom Enerjisi Təşkilatının sədri Məhəmməd İslami bəyan edib ki, İsrail və ABŞ-ın İranın nüvə obyektlərinə hücumu beynəlxalq qanunların, BMT Nizamnaməsinin və Beynəlxalq Atom Enerjisi Agentliyinin (BAEA) qaydalarının açıq şəkildə pozulmasıdır. Onun sözlərinə görə, hədəf alınan obyektlər sazişlərə uyğun şəkildə fəaliyyət göstərir və beynəlxalq nəzarət altındadır.
Vyana toplantısında sərt mesajlar
İslami bu fikirləri Vyanada keçirilən BAEA-nın 69-cu Baş Konfransında çıxışı zamanı səsləndirib. O bildirib ki, İran silahlı qüvvələri hücuma qətiyyətlə cavab verib və hər hansı yeni təxribat daha güclü və dağıdıcı reaksiyaya səbəb olacaq. “İran düşmənləri anlamalıdır ki, nüvə sənayemiz tariximizə söykənir və terror, sui-qəsd və ya hərbi hücumlarla silinə bilməz”, – deyə o vurğulayıb.
İsrailin hədəfi: diplomatiyanı pozmaq
İslaminin sözlərinə görə, İsrailin məqsədi yalnız nüvə infrastrukturlarını sıradan çıxarmaq deyil, həm də bölgədə diplomatiya və sülh prosesini sabotaj etməkdir. O, hücumu BAEA tarixində görünməmiş bir təcavüz kimi dəyərləndirib və təşkilatın nüfuzuna zərbə olduğunu bildirib.
İslami həmçinin vurğulayıb ki, ABŞ təzyiqləri səbəbindən nə BAEA, nə də BMT Təhlükəsizlik Şurası hücumu pisləyə bilib. Bu isə, onun fikrincə, beynəlxalq təşkilatlar üçün böyük nüfuz itkisi sayılır.
İranın mövqeyi dəyişir
Atom Enerjisi Təşkilatının rəhbəri qeyd edib ki, BAEA-nın rəsmi hesabatları İranın nüvə silahı istehsalına yönəlik heç bir fəaliyyət göstərmədiyini açıq şəkildə ortaya qoyub. Buna baxmayaraq, hücuma qarşı səssiz qalınmasını “agentliyin tarixində qara ləkə” adlandırıb.
İslami əlavə edib ki, İran hələ də Nüvə Silahlarının Yayılmaması Müqaviləsinə sadiqdir, lakin bundan sonra əməkdaşlıq əvvəlki səviyyədə olmayacaq. O, konfrans iştirakçılarını İranın nüvə obyektlərinə edilən hücumu rəsmən pisləməyə çağırıb.
