Netanyahu və Misir arasında gərginlik
İsrailin baş naziri Benyamin Netanyahu bir daha Misiri hədəfə alaraq, Kahire rəhbərliyini Gazzədəki fələstinliləri iradələrinə zidd olaraq “həbs etməkdə” ittiham edib. Baş nazirin ofisindən yayılan açıqlamada iddia olunur ki, İsrailin şiddətli hücumlarından xilas olmaq istəyən Gazzə sakinlərinin bölgədən çıxışına Misir imkan vermir.
Netanyahu həmçinin bildirib ki, ağır hücumlar və humanitar yardım blokadası altında yaşayan Gazzəlilərin “yaşayış yerlərini sərbəst seçmək hüququ” var.
Misirin qəti mövqeyi
Bu açıqlamalar, Misir Xarici İşlər naziri Bedr Abdulatinin İsrailin Gazzəliləri zorla köçürmək planına qarşı sərt bəyanatından sonra səslənib. Abdulati, “Yerindən edilmə bizim üçün qırmızı xətdir, buna heç vaxt icazə verməyəcəyik” deyərək İsrailin niyyətini rədd edib.
Netanyahu isə “Abu Ali Express” kanalına verdiyi müsahibədə, Misirin fələstinlilərin sürgün edilməsinə qarşı sərt mövqeyinə toxunaraq, Refah sərhəd-keçid məntəqəsinin açılmasının yalnız Misirin razılığı ilə mümkün ola biləcəyini bildirib.
Kahiredən sərt reaksiya
Misir Xarici İşlər Nazirliyi açıqlamasında ölkənin fələstinlilərin məcburi köçürülməsinə razı olmayacağını və “yerindən edilmələrin qapısı”na çevrilməyəcəyini vurğulayıb. Nazirlik həmçinin bölgədə gərginliyin dayandırılması, atəşkəsin təmin olunması və İsrail ordusunun Gazzədən tamamilə çəkilməsi çağırışı edib.
Misir Dövlət İnformasiya Qurumunun rəhbəri Ziya Raşvan da Netanyahuya cavab olaraq bildirib ki, Refah sərhəd-keçid məntəqəsi fələstinlilərin yeni sürgünə göndərilməsi üçün deyil, 1948-ci ildə işğal olunmuş torpaqlarına qayıdış üçün açılmalıdır.
Raşvan əlavə edib: “Əgər fələstinlilərin azad seçim hüququndan danışırsansa, onda istiqaməti yalnız sən müəyyənləşdirməməlisən. Onların öz doğma torpaqlarına qayıtmaq haqqı var. Misir məcburi köçürülməyə heç vaxt razılıq verməyəcək.”
