Epşteyn işi yeni hüquqi mərhələyə keçdi
ABŞ-nin Nyu-Meksiko ştatı Cefri Epşteynin ştat ərazisində törətdiyi iddia olunan cinayətlərlə bağlı aparılan istintaq üzrə federal sənədlərin senzurasız təqdim edilməsi tələbi ilə ABŞ Ədliyyə Nazirliyinə qarşı məhkəmə iddiası qaldırıb.
Nyu-Meksiko Baş Prokurorluğu bildirib ki, Ədliyyə Nazirliyinin istintaq materiallarını paylaşmaqdan imtina etməsi İnzibati Prosessual Qanunun tələblərini pozur və ştatın öz ərazisində baş verdiyi iddia olunan cinayətləri araşdırmaq səlahiyyətinə mane olur.
Sənədlərin tam təqdim edilməsi tələb olunur
Məhkəməyə təqdim olunan iddia ərizəsində federal qurumun məlumatları gizli saxlamasının qanunsuz hesab edilməsi və bütün sənədlərin senzurasız şəkildə Nyu-Meksiko rəsmilərinə təqdim olunması tələb edilir.
“Gecikmə ədalətə zərbə vurur”
Nyu-Meksikonun baş prokuroru Raul Torres bildirib ki, ştatın əsas vəzifəsi zərərçəkənləri qorumaq və ərazidə törədildiyi iddia olunan cinayətləri araşdırmaqdır.
Onun sözlərinə görə, mümkün cinayətlərin, zərərçəkənlərin və şahidlərin müəyyənləşdirilməsi üçün vacib olan materialların təqdim edilməməsi istintaqa ciddi zərər vurur və Epşteyn qurbanlarının ədalətə qovuşmasını gecikdirir.
“Zorro Ranch” istintaqın mərkəzindədir
İddia ərizəsində qeyd olunur ki, Cefri Epşteyn Nyu-Meksikodakı “Zorro Ranch” adlı malikanədən 25 ildən artıq müddətdə istifadə edib və açıq məhkəmə sənədlərində bu əmlakla bağlı minlərlə istinad mövcuddur.
Sənəddə həmçinin federal materiallarda həmin malikanə, Epşteyn və onunla əlaqəli, insan alveri və cinsi istismar cinayətlərinə görə məhkum edilmiş Gisleyn Maksvellə bağlı sübutların olduğu iddia edilir.
Federal qurumlar məlumat paylaşmayıb
Məhkəmə sənədlərinə əsasən, federal prokurorlar 2019-cu ildə Nyu-Meksiko rəsmilərindən öz araşdırmalarını dayandırmağı istəyərək, federal istintaq başa çatdıqdan sonra bütün məlumatların paylaşılacağını bildiriblər.
Lakin ştat rəhbərliyi bu vədin yerinə yetirilmədiyini, tələb olunan sənədlərin indiyədək təqdim olunmadığını açıqlayıb.
Bununla yanaşı, Nyu-Meksiko hüquq-mühafizə orqanlarının istintaqı yenidən başladığı və “Zorro Ranch” ərazisində ilk dəfə axtarış apardığı bildirilib.
