Marşrutun koordinatları razılaşdırılıb
İran Dövlət Televiziyasının məlumatına görə, ölkənin Xarici İşlər Nazirliyinin sözçüsü İsmayıl Bəqayi Hörmüz boğazında ticarət gəmilərinin təhlükəsiz hərəkətini təmin edəcək marşrutun coğrafi koordinatları üzrə İran və Oman arasında razılıq əldə olunduğunu bildirib.
Onun sözlərinə görə, İran və Oman – Hörmüz boğazının iki sahilyanı dövləti kimi – yeni dəniz marşrutunun müəyyənləşdirilməsi istiqamətində aparılan danışıqlarda mühüm mərhələni geridə qoyublar.
Texniki və hüquqi məsələlər araşdırılıb
Bəqayi qeyd edib ki, marşrutun texniki, hüquqi, təhlükəsizlik və ekoloji aspektləri İranın aidiyyəti dövlət qurumları tərəfindən ətraflı şəkildə qiymətləndirilib.
O bildirib ki, üçüncü tərəflərin prosesə mane olmaması halında, tərəflərin razılaşdırdığı əsas prinsipləri əks etdirən birgə bəyanatın hazırlanması yekun mərhələyə çatıb.
Təhlükəsizliklə bağlı narahatlıqlar qalır
İran rəsmisi vurğulayıb ki, Tehran və Maskat arasında əldə olunan razılaşma təkbaşına Hörmüz boğazında tam təhlükəsizliyi təmin etmir.
Onun sözlərinə görə, ABŞ-ın bölgədəki fəaliyyəti səbəbindən boğazda təhlükəsizlik riskləri hələ də qalmaqdadır.
Danışıqlar davam edir
Xatırladaq ki, İran Hörmüz boğazında ticarət gəmilərinin təhlükəsiz hərəkətini təmin edəcək marşrutun müəyyənləşdirilməsi məqsədilə Omanla texniki və siyasi danışıqlara başlamışdı.
İran Xarici İşlər Nazirliyi daha əvvəl bu danışıqlarda irəliləyiş əldə olunduğunu açıqlamışdı. Hazırda tərəflər razılaşmanın yekun sənədinin hazırlanması üzərində işi davam etdirirlər.
