“Wall Street Journal”: Kampaniyanın dəyəri 50 milyon dollardır
ABŞ-ın “Wall Street Journal” nəşrinin məlumatına görə, sionist rejim hökuməti ABŞ-da İsrailə münasibəti dəyişmək məqsədilə təxminən 50 milyon dollarlıq təsir kampaniyası həyata keçirir.
Nəşr yazır ki, kampaniya çərçivəsində ABŞ vətəndaşlarına süni intellekt vasitəsilə hazırlanmış qısa mesajlar göndərilib.
SMS-lər və süni intellektdən istifadə edildiyi bildirilir
Məlumata əsasən, mesajlar “Sülh naminə Dostlar” adlı qrupun adından göndərilib və ABŞ-sionist rejim münasibətlərinə dair suallar əks etdirib.
Qəzetin məlumatına görə, bu mətnlər rejim hökuməti ilə ABŞ Prezidenti Donald Trampın keçmiş seçki kampaniyasının rəqəmsal strategiya rəhbəri Bred Parskeylin şirkəti arasında imzalanmış 45 milyon dollarlıq müqavilənin tərkib hissəsidir.
Onlarla şirkətin cəlb edildiyi qeyd olunur
Nəşrin məlumatına görə, işğalçı İsrail son bir il ərzində ABŞ-da ən azı altı müxtəlif şirkətlə əməkdaşlıq edib.
Bildirilib ki, marketinq sahəsində çalışan 30-dan çox şəxs də işğalçı İsrail adından xarici nümayəndə kimi rəsmi qeydiyyatdan keçib.
Media və sosial şəbəkələr də kampaniyanın tərkib hissəsi kimi göstərilir
“Wall Street Journal” yazır ki, kampaniya çərçivəsində mühafizəkar media qurumlarında reklamlar yerləşdirilib, sosial media məzmun istehsalçıları ilə əməkdaşlıq edilib və süni intellekt platformalarında rejim barədə daha müsbət məzmunun önə çıxmasına xidmət edən internet resursları yaradılıb.
Bundan əlavə, nəşr xatırladıb ki, sionist rejimin xarici işlər naziri Gideon Saar ötən il ölkənin beynəlxalq imicinin gücləndirilməsi və ictimai rəyə təsir fəaliyyətləri üçün 2026-cı il büdcəsində 700 milyon dollardan çox vəsait ayrıldığını açıqlamışdı.
