Çabaharda dəniz nəzarət qülləsi məhv edilib
İran dövlət televiziyasının məlumatına görə, ABŞ-ın bu gün səhər saatlarında Çabahar şəhərində yerləşən dəniz nəzarət qülləsinə endirdiyi raket zərbəsi son günlər ərzində həmin obyektə qarşı həyata keçirilən üçüncü hücum olub.
Bildirilib ki, hücum nəticəsində qüllə tamamilə dağılıb.
Qüllə gəmiçiliyin təhlükəsizliyinə nəzarət edirdi
Məlumata əsasən, dəniz nəzarət qülləsi gəmi hərəkətinin tənzimlənməsi və balıqçıların xilasetmə əməliyyatlarının koordinasiyasına cavabdeh idi.
İran dövlət televiziyası ABŞ-ı beynəlxalq hüquq normalarına və mövcud razılaşmalara əməl etməməkdə günahlandırır.
ABŞ hücumları davam edir
İranın rəsmi KİV-lərinin məlumatına görə, cümə axşamından cümə gününə keçən gecə ABŞ aviazərbələri nəticəsində hava limanı, dəmir yolu stansiyası və iki körpü hədəfə alınıb.
Məlumata görə, hücumlar nəticəsində üç nəfər həlak olub.
İran cavab əməliyyatı keçirdiyini açıqlayıb
Buna cavab olaraq İran İslam İnqilabı Keşikçiləri Korpusunun ictimaiyyətlə əlaqələr xidməti “Nəsr 2” əməliyyatının on birinci mərhələsi çərçivəsində Suriyanın Ət-Tanf bölgəsində yerləşən düşmənin xüsusi əməliyyatlar komanda mərkəzinə zərbə endirildiyini bildirib.
Son günlər ABŞ-ın İranın cənub bölgələrinə hücumlarını davam etdirdiyi, Tehranın isə buna cavab olaraq bölgədəki ABŞ hərbi bazaları və strateji obyektlərini hədəfə aldığı qeyd olunur.
