İran təyyarəsi Hudeydəyə eniş etdi
İranın mülki təyyarəsi Yəmənin qərbində, Qırmızı dəniz sahilində yerləşən Hudeydə Beynəlxalq Hava Limanına uğurla eniş edib.
Məlumata görə, təyyarə rəsmi Yəmən nümayəndə heyətini ölkəyə çatdırıb. Eniş Səna Beynəlxalq Hava Limanının həmin gün hava zərbələrinə məruz qalmasından sonra baş tutub.
Səna hökuməti Səudiyyə Ərəbistanını ittiham etdi
Sənada fəaliyyət göstərən Xarici İşlər Nazirliyi bəyan edib ki, Səudiyyə Ərəbistanı bu addımı ilə müharibə elan edib və bunun bütün məsuliyyətini daşıyır.
Nazirlik həmçinin bildirib ki, vəziyyət tələb edərsə, Yəmənin müxtəlif cavab variantları mövcuddur və ölkə İranla koordinasiyanı davam etdirir.
“Ənsar Allah”dan sərt bəyanatlar
Yəmən Silahlı Qüvvələrinin sözçüsü Yəhya Səri bildirib ki, Səna Beynəlxalq Hava Limanına endirilən zərbələr cavabsız qalmayacaq.
“Ənsar Allah” hərəkatının sözçüsü Məhəmməd Əbdüssəlam isə hava limanının bombalanmasını Yəmənin suverenliyinin kobud şəkildə pozulması və 2022-ci il atəşkəs razılaşmasının pozulması kimi qiymətləndirib.
Onun sözlərinə görə, Səudiyyə Ərəbistanı Yəmənə tətbiq edilən blokadanın davam etdirilməsində əsas rol oynayır və hava limanının fəaliyyətinin bərpası ilə bağlı bütün təklifləri rədd edib.
“Cavab güclü olacaq”
“Ənsar Allah” hərəkatının Siyasi Bürosunun üzvü Əli əl-Qəhum Səna hava limanına hücuma cavabın “güclü və sarsıdıcı” olacağını bildirib.
O vurğulayıb ki, Yəmən tərəfinin cavabı gecikməyəcək və ölkəyə qarşı blokadanın aradan qaldırılması istiqamətində atılan addımlar davam etdiriləcək.
Bu, ikinci İran təyyarəsidir
Məlumata görə, bu, son günlər Yəmənə eniş edən ikinci İran mülki təyyarəsidir.
Bundan əvvəl iyulun 3-də İran təyyarəsi Səna Beynəlxalq Hava Limanına enərək 200-dən çox yəmənli xəstəni, xaricdə qalmış sərnişinləri və Tehranda keçirilən mərasimdə iştirak etmiş rəsmi nümayəndə heyətini ölkəyə qaytarmışdı.
Qeyd edək ki, 2016-cı ildən etibarən Yəmənin hava məkanına tətbiq olunan məhdudiyyətlər səbəbindən Səna Beynəlxalq Hava Limanı kommersiya uçuşları üçün bağlıdır. Hava limanı ölkə əhalisinin təxminən 80 faizinə xidmət göstərən əsas nəqliyyat qovşağı hesab olunur.
