Tehranda vida mərasimi yekunlaşdı
Tehranda Şəhid Ayətullah Seyid Əli Xamenei və ailə üzvləri ilə keçirilən vida mərasimi iki günlük kütləvi iştirakın ardından başa çatıb.
Mərasim İmam Xomeyni Müsəlla məscidində təşkil olunub və son anlarda tabutun üzəri son dəfə bağlanarkən qırmızı işıqlandırma və vida mərasiminə həsr olunan dini marş səsləndirilib.
İran mediasının məlumatına görə, tədbirə böyük maraq səbəbindən mərasimin müddəti uzadılıb ki, daha çox insan vida mərasimində iştirak edə bilsin.
Milyonlarla insan və xarici nümayəndə heyətləri iştirak edib
Vida mərasimi boyunca İranın müxtəlif bölgələrindən gələn insanlar, şəhid ailələri, hərbçilər, dövlət rəsmiləri və xarici nümayəndə heyətləri İmam Xomeyni Müsəllasına axın ediblər.
Məlumata görə, tədbirlərdə 100-dən çox ölkədən nümayəndələr iştirak edib.
Mərasimdə Rusiya, Pakistan, Çin, İraq, Körfəz ölkələri, eləcə də bir sıra ərəb və islam dövlətlərinin nümayəndə heyətlərinin yer aldığı bildirilib.
Bundan əlavə, Livanın Hizbullah hərəkatı və Fələstinin HƏMAS nümayəndələri də vida mərasimində iştirak ediblər.
Dəfn mərasimi sabah başlayacaq
Rəsmi məlumata əsasən, şəhid Ayətullah Seyid Əli Xameneinin dəfn mərasimi bazar ertəsi səhər Tehranda keçiriləcək.
Daha sonra cənazə İranın Qum şəhərinə, oradan isə İraqın Nəcəf və Kərbəla şəhərlərinə aparılacaq.
Rəsmi proqramın son mərhələsində nəş iyulun 9-da Məşhəd şəhərində yerləşən İmam Rza (ə) ziyarətgahında dəfn olunacaq.
Altı gün davam edəcək mərasim
İran rəsmilərinin açıqlamasına görə, dəfn mərasimləri ümumilikdə altı gün davam edəcək.
Rəsmi qiymətləndirmələrə əsasən, mərasimlərdə 15–20 milyon insanın iştirak edəcəyi gözlənilir ki, bu da ölkə tarixinin ən böyük rəsmi dəfn mərasimlərindən biri hesab olunur.
