Papa XIV Leo Madriddə çıxış etdi
Papa XIV Leo İspaniyaya səfəri çərçivəsində Madriddə yerləşən Kral Sarayında çıxış edib. Tədbirdə kral VI Felipe və ailə üzvləri, baş nazir Pedro Sançes, hökumət nümayəndələri, eləcə də siyasi, diplomatik və dini dairələrin yüksək səviyyəli təmsilçiləri iştirak ediblər.
Papa çıxışında İspaniya hökumətinin beynəlxalq hüquqa, çoxtərəfli əməkdaşlığa və sülh təşəbbüslərinə verdiyi dəstəyi xüsusi qeyd edib. O, rəsmi Madridin bu istiqamətdəki siyasətinə görə təşəkkürünü bildirib.
“Silahlar deyil, əməkdaşlıq önəmlidir”
Papa XIV Leo çıxışı zamanı təhlükəsizlik və sabitliyin yalnız hərbi vasitələrlə təmin edilməsinin doğru yanaşma olmadığını vurğulayıb. O bildirib ki, təhlükəsizlik üçün “silahlara və divarlara” deyil, birgə əməkdaşlığa üstünlük verilməlidir.
Papa siyasətçiləri və dövlət qurumlarını təhsil, universitetlər, elmi araşdırmalar və vətəndaş cəmiyyətinə ayrılan investisiyaları artırmağa çağırıb.
Əndəlus dövrünə diqqət çəkdi
Papa çıxışında İspaniyanın tarixi keçmişinə də toxunub. O, Əndəlus dövründə müsəlmanların İspaniyadakı varlığının yalnız münaqişə ilə yadda qalmadığını, eyni zamanda müsəlmanlar, xristianlar və yəhudilər arasında dialoq və birgəyaşayış mühiti yaratdığını qeyd edib.
Onun sözlərinə görə, həmin dövr müxtəlif dini icmalar arasında qarşılıqlı anlaşma və həqiqət axtarışı baxımından mühüm mərhələ olub.
Qərbi Asiya ilə bağlı mesajlar gözlənilir
Papa XIV Leonun İspaniya parlamentində də çıxış edəcəyi gözlənilir. Məlumata görə, o, Qərbi Asiyada davam edən münaqişələr və regional gərginliklə bağlı sülh mesajları verəcək.
İspaniya hökuməti son dövrdə Qəzza və regiondakı hadisələrlə bağlı beynəlxalq hüquqa əsaslanan mövqe nümayiş etdirir. Rəsmi Madrid Fələstin dövlətini tanıyıb və bölgədə humanitar vəziyyətlə bağlı narahatlığını bir neçə dəfə ifadə edib.
Madrid və Təl-Əviv arasında gərginlik
İspaniya rəsmiləri son aylarda İsrailin hərbi əməliyyatlarını tənqid edən açıqlamalar veriblər. Xarici işlər naziri Xose Manuel Alvares İsrailin addımlarının beynəlxalq hüquqa uyğun olmadığını bildirib və tərəflər arasında əməkdaşlıq mexanizmlərinin yenidən nəzərdən keçirilməsini təklif edib.
Diplomatik münasibətlərdəki gərginlik fonunda İspaniyanın İsraildəki səfiri geri çağırılıb. Madrid həmçinin Livandakı vəziyyətlə bağlı humanitar narahatlıqlarını da ifadə edib.
