Tramp–Putin telefon danışığı gündəmdə
ABŞ Prezidenti Donald Tramp bazar günü Rusiya Prezidenti Vladimir Putinlə telefon danışığı apardığını və bu danışığın “çox səmərəli” keçdiyini açıqlayıb. Tramp bildirib ki, həm Rusiya, həm də Ukrayna liderləri razılaşmaya nail olmaq istəyir və proses hazırda həlledici mərhələyə daxil olub.
ABŞ Prezidenti qeyd edib ki, Ukrayna Prezidenti Volodimir Zelenski ilə görüşdən sonra Putinlə yenidən əlaqə saxlayacaq. Onun sözlərinə görə, hazırkı mərhələdə razılaşma əldə olunmasa, müharibə daha da uzana bilər.
“Danışıqlar son mərhələdədir”
Donald Tramp vurğulayıb ki, tərəflər arasında aparılan danışıqlar yekun mərhələyə yaxındır. O bildirib ki, indiki anda razılıq əldə olunmaması vəziyyətin daha da ağırlaşmasına və münaqişənin uzanmasına səbəb ola bilər. Tramp bu səbəbdən diplomatik səylərin intensivləşdirilməsinin vacibliyini önə çəkib.
Kreml: təşəbbüs Trampdan gəlib
Rusiya Prezident Administrasiyası – Kreml də telefon danışığı ilə bağlı açıqlama yayıb. Bildirilib ki, Tramp və Putin arasında baş tutan əlaqə ABŞ prezidentinin təşəbbüsü ilə reallaşıb. Açıqlamada qeyd olunub ki, hər iki lider Avropa və Ukrayna tərəfindən irəli sürülən müvəqqəti atəşkəs təklifinin münaqişəni daha da uzadacağı qənaətindədir.
Kremlin mövqeyinə görə, bu cür təkliflər real həllə deyil, vaxt udmağa xidmət edir və qarşıdurmanın dərinləşməsi riskini artırır.
Donbas məsələsi ilə bağlı mesaj
Rusiya tərəfi eyni zamanda Ukraynanın Donbas bölgəsi ilə bağlı qərar qəbul etməsini gecikdirməməli olduğunu bəyan edib. Kreml hesab edir ki, bu məsələ münaqişənin gələcək taleyində əsas açar mövzulardan biridir və təxirəsalınmaz yanaşma tələb edir.
Zelenskinin açıqlamaları fonunda danışıq
Telefon danışığı Ukrayna Prezidenti Volodimir Zelenskinin ABŞ Prezidenti ilə görüşə hazırlaşdığı bir vaxta təsadüf edir. Zelenski şənbə günü verdiyi açıqlamada bildirib ki, əgər ABŞ və ya Avropa Rusiyanın mövqeyini dəstəkləsə, bu, müharibənin davam etməsi demək olacaq.
Putindən sərt xəbərdarlıq
Rusiya Prezidenti Vladimir Putin isə şənbə günü çıxışında Qərbdə bəzi dairələrin Ukraynaya münaqişəni bitirmək üçün “layiqli şərtləri” qəbul etməyi tövsiyə etdiyini deyib. Putin vurğulayıb ki, Kiyev rejimi münaqişəni sülh yolu ilə həll etməyə tələsmir. O əlavə edib ki, əgər Ukrayna sülh yolunu seçməzsə, Rusiya qarşıya qoyulan məqsədlərə hərbi vasitələrlə nail olacaq.
