Ayətullah Xamenei: “İran mövcud çətinliklərə baxmayaraq irəliləməkdədir”
İslam İnqilabının Lideri Ayətullah Seyyid Əli Xamenei bildirib ki, ölkədə mövcud olan ciddi çatışmazlıqlara və çoxsaylı çətinliklərə baxmayaraq, İran xalqı sədaqət, möhkəmlik və ədalət axtarışı ilə durmadan irəliləyir. Onun sözlərinə görə, xalqın gündən-günə nümayiş etdirdiyi dözüm və fədakarlıq həm İslam, həm də İran üçün yeni güc və qürur yaradır.
Tehranda Həzrət Fatimeyi-Zəhranın (s.ə) mövludu münasibətilə keçirilən görüşdə çıxış edən Ayətullah Xamenei vurğulayıb ki, iyun ayında İsrail və ABŞ-ın təcavüzündən sonra İranın qətiyyətli cavabı rəqibləri atəşkəsə məcbur etsə də, hazırda ölkə genişmiqyaslı informasiya və təbliğat müharibəsinin mərkəzindədir. O qeyd edib ki, düşmən hərbi yolla nəticə əldə edə bilməyəcəyini anlayaraq informasiya sahəsində daha aqressiv davranır.
“Təhdidlərin şişirdilməsi cəmiyyətdə narahatlıq yaratmaq üçündür”
Ayətullah Xamenei yenidən müharibə ehtimalını qabardan dairələri tənqid edərək bəzi qrupların qəsdən cəmiyyətdə nigarançılıq yaratmağa çalışdıqlarını bildirib. O, bu cəhdlərin uğursuz olacağına əmin olduğunu deyib.
Liderin sözlərinə görə, düşmənin əsas məqsədi İslam İnqilabının məzmununu, məqsədlərini və mənəvi təsirini silməkdir. ABŞ bu geniş və aktiv düşmən cəbhəsinin mərkəzində dayanır, bəzi Avropa dövlətləri isə ona dəstək verir. Avropada yaşayan müəyyən daxili ünsürlərin isə şəxsi maraqlar naminə bu cəbhənin kənarında fəaliyyət göstərdiyi qeyd olunub.
“Mədəniyyət və kimlik hədəfdədir”
Ayətullah Xamenei bildirib ki, Qərbin təbliğat kampaniyalarına qarşı dayanmaq çətin olsa da, mümkündür. Onun fikrincə, informasiya savaşında əsas hədəf İslam, Şiəlik və inqilabi dəyərlərdir və İran cəmiyyəti məhz bu istiqamətdə ayıq-sayıq olmalıdır.
Lider İran xalqının milli müqavimət sayəsində dini, tarixi və mədəni kimliyini dəyişdirmək cəhdlərini dəf etdiyini vurğulayıb. O əlavə edib ki, təbliğat hücumlarına qarşı həm müdafiə, həm də hücum formatında düzgün təşkilatlanma tələb olunur, çünki bu hücumların məqsədi insanların düşüncəsini, qəlbini və inancını hədəfə almaqdır.
“Bir əsrlik kimlik mübarizəsi”
Ayətullah Xamenei xatırladıb ki, son yüz ildən çox müddətdə xarici qüvvələr İranın kimliyini dəyişdirməyə çalışıb, lakin İslam İnqilabı bu planları əhəmiyyətsiz edib. Son onilliklərdə xalqın möhkəm dayanışı sayəsində düşmənin geniş təzyiqləri nəticəsiz qalıb.
Onun sözlərinə görə, İranın müqavimət modeli region ölkələrinə də təsir edib və bu anlayış sərhədləri aşaraq daha geniş coğrafiyalara yayılıb.
“İran xalqı ağır sınaqlardan alnıaçıq çıxıb”
Ayətullah Xamenei bildirib ki, düşmənin İran xalqına tətbiq etdiyi təzyiqlər başqa bir ölkəyə yönəlsəydi, həmin ölkə çoxdan süquta uğraya bilərdi. Bununla belə, İranın irəliləyişi yalnız hərbi və informasiya təzyiqlərinə qarşı davamlı müqavimətlə mümkün olacaq.
Lider sonda xalqı ayıq olmağa və mədəni, tarixi və dini kimliyi qorumaq üçün səyləri davam etdirməyə çağırıb.
