Yəmən ordusu Birləşmiş Ərəb Əmirliklərinin (BƏƏ) gəmisini “düşmənçilik hərəkətləri” ittihamı ilə ələ keçirib.

Az.rasthaber.com "Trend"-ə istinadən xəbər verir ki, gəminin Yəmənin şimalında Səudiyyə Ərəbistanının Cizan liman şəhərinə getdiyi qeyd edilib.

Hadisə ötən gecə Qırmızı dənizdə baş verib.

Səudiyyə Ərəbistanı gəmidə tibbi avadanlığın olduğunu iddia etsə də, Yəmən ordusunun paylaşdığı görüntülər tam əksini isbat edib.

Yəmən ordusunun rəsmisi bəyan edib ki, gəmidəki hərbi texnika Yəmən xalqının təhlükəsizliyi və sabitliyinə təhdiddir.

Səudiyyə Ərəbistanı və onun başçılıq etdiyi koalisiyanın Yəmən və onun xalqına qarşı işğal və təcavüz siyasəti altı ildən çoxdur ki, davam edir.