UNRWA-nın kommunikasiya direktoru Touma verdiyi yazılı açıqlamada Qəzza zolağındakı vəziyyətlə bağlı məlumat verib.

Az.rasthaber.com xəbər verir ki, Touma, işğalçı İsrail rəhbərliyinin Qəzza zolağının blokadasının 6 həftədən çox davam etdiyi bir vaxtda bütün əsas ehtiyacların tükənməyə başladığına diqqət çəkib.

Touma sionist İsrailin Qəzza zolağına tətbiq etdiyi blokadadan sonra son bir ayda Qəzzada ilkin tələbat mallarının tükənməsi ilə eyni vaxtda mövcud malların qiymətlərində əhəmiyyətli artım olduğunu qeyd edib və bunun körpə və uşaqların yatağa ac qalması anlamına gəldiyini vurğulayıb.

Bu əsas ehtiyaclar olmadan Qəzza zolağının hər keçən gün ifrat aclıq təhlükəsinə yaxınlaşdığını vurğulayan Touma Qəzzada atəşkəsin dərhal bərpa olunmasını, blokadanın götürülməsini, humanitar və kommersiya yardımlarının maneəsiz şəkildə Qəzza zolağına daxil olmasını istəyib.

HƏMAS ilə atəşkəs və məhbus mübadiləsi razılaşmasının 42 günlük birinci mərhələsi başa çatdıqdan sonra qatil İsrail martın 2-dən Qəzza zolağına humanitar yardımın daxil olmasını dayandırmağa qərar verib.

2023-cü il oktyabrın 7-dən bu yana soyqırım törədən İsrail ordusunun həyata keçirdiyi hücumlar nəticəsində 2 milyon 300 min əhalisi olan Qəzza zolağında təxminən 2 milyon insan didərgin düşüb.İsrail mülki infrastrukturu və xəstəxanaları da hədəf alaraq Qəzzada humanitar fəlakətə səbəb olub.

Bölgəyə su və elektrik verilişinin kəsilməsi və sərhəd qapılarının bağlı saxlanılması fələstinlilərin Qəzzada yaşadığı çətin vəziyyəti daha da dərinləşdirir.

Yanvarın 19-da Qəzza zolağında qüvvəyə minən atəşkəsdən sonra sionist İsrail ordusu martın 18-i səhər saatlarında şiddətli hücumlarını bərpa edib.

Qatil İsrail ordusu yenidən hücumlara başladıqdan sonra əksəriyyəti qoca, qadın və uşaq olmaqla 1542 fələstinli şəhid olub, 3940 nəfər yaralanıb.

Soyqırım törədən İsrailin 7 oktyabr 2023-cü il tarixindən etibarən Qəzza zolağında həyata keçirdiyi hücumlarda şəhid olan fələstinlilərin sayı 50 min 912, yaralıların sayı isə 115 min 981-ə yüksəlib.