ABŞ Nümayəndələr Palatasının Xüsusi Komitəsi bu ölkənin sabiq prezidenti Donald Trampa məhkəmədə ifadə verməsi üçün rəsmi çağırış vərəqəsi göndərib.

Az.rasthaber.com xəbər verir ki, 2021-ci il yanvarın altısında baş verən Kapitol hücumunu araşdıran komitənin göndərdiyi çağırış vərəqəsində Trampdan altı yanvar istintaqı ilə bağlı tələb olunan sənədləri noyabrın dördünədək təhvil verməsi tələb olunur.

2021-ci il yanvarın altısında Co Baydenin bu ölkənin prezident seçkilərində qalib gəlməsinin yekun təsdiqi məqsədilə təşkil edilən konqresin müştərək iclası gedişində Trampın havadarlarından bir qrupu konqres binasının içərisinə basqın etdi. Bu basqın Trampın öz havadarlarını konqres qarşısına toplaşmaq üzrə çağırışının ardınca baş verdi. Basqın zamanı azı altı nəfər öldürüldü.

Sözügedən çağırış vərəqəsində Tramp Amerikanın hazırkı prezidenti Co Baydenin qələbəsinə gətirib çıxaran 2020-ci il prezident seçkilərinin nəticələrini ləğv etmək üzrə fitnəkarlıq törətməkdə ittiham edilir.

Kapitol hücumunu araşdıran komitənin doqquz üzvü qeyd olunan çağırış vərəqəsində Trampdan təxminən noyabrın 14-dən başlayaraq bir və ya bir neçə gün ərzində andiçmə altında ifadə verməsini istəyib. Onlar Trampdan konqres üzvləri və ekstremist qruplarla şəxsi yazışmaları da daxil olmaqla bəzi sənədləri məhkəmə iclasına gətirməsini tələb ediblər.