Xəbər mənbələri Qəzzanın müxtəlif bölgələrində toqquşmaların davam etdiyini və çox sayda fələstinlinin şəhid olduğunu bildirib.

Az.rasthaber.com xəbər verir ki, sionist rejim bu gün Nusəyrat düşərgəsində mülki avtomobili hədəfə alıb və 2 nəfər şəhid olub, bir neçə nəfər yaralanıb.

Rəfahın cənubunda isə işğalçı qüvvələrin artilleriya hücumları və atəşi nəticəsində bir nəfər şəhid olub, bir neçə nəfər isə yaralanıb.

İşğalçı rejim qırıcıları Əl-Bric düşərgəsindəki yaşayış evini də hədəfə alıblar.

Həmçinin, Əl-Məğazi düşərgəsindəki daha bir ev İsrailin hava hücumlarına məruz qalıb və 5 nəfər şəhid olub.

Qəzzanın cənubunda yerləşən Həyy Əl-Bəsrə məhəlləsində və Əs-Səlam məscidi yaxınlığında bir evin bombalanması nəticəsində 2 nəfər şəhid olub, 6 nəfər isə yaralanıb.

Həmçinin xəbər mənbələri sionist rejim qırıcılarının Xan Yunis şəhərinin şərqindəki Xuzaə bölgəsində bir neçə mülki vətəndaşı hədəfə aldığını və nəticədə 5 nəfərin yaralandığını bildirib.

Mətbuat bu gün səhər saatlarından Qəzzada ümumilikdə 15 nəfərin şəhid olduğunu bildirib.

Bu mənbələr son 5 gündə sionist rejimin Əl-Vusta bölgəsinə hücumları nəticəsində 200-dən çox insanın şəhid olduğunu bildirirlər.