Pakistanın Xeybər-Paxtunxva bölgəsində silahlılarla qarşıdurmada azı üç hərbçi həlak olub.

Az.rasthaber.com SalamNews-a xəbər verir ki, bu barədə Pakistan Ordusu sosial şəbəkələrdəki hesabları üzərindən məlumat yayıb.

Bildirilib ki, Xeybər-Paxtunxvada Əfqanıstanla sərhəddə silahlıların sığınacağı olan məntəqədə baş verən atışmada üç hərbçi həlak olub və qarşı tərəfdən də dörd silahlı məhv edilib.

Qeyd edək ki, ötən həftənin bazar günü də Bəluçistan əyalətində beş hərbçi quraşdırılmış bombanın işə salınması nəticəsində həlak olmuşdu.

Pakistan Ordusu həmçinin ötən həftənin bazar günü Əfqanıstanla sərhəddə qaçaqçılarla atışmada bir əsgərinin öldüyünü açıqlamışdı.