İranın xarici işlər naziri Hüseyn Əmir Abdullahiyan Fələstin İslami Cihad Hərəkatının baş katibi Ziyad ən-Nəhalə ilə telefon danışığı aparıb.

Az.rasthaber.com xəbər verir ki, bu telefon danışığında Fələstindəki son hadisələr və sionist İsrailin Qəzza zolağına hücumları müzakirə edilib.

Əmir Abdullahiyan sionist rejimin Qəzza zolağına vəhşicəsinə hücumunu, müqavimət liderlərinin şəhadətini və günahsız Fələstin xalqını, xüsusilə də qadın və uşaqları qətlə yetirməsini və insan haqlarını açıq şəkildə pozmasını kəskin şəkildə pisləyib.

Əmir Abdullahiyan da Fələstin xalqının və müqavimət qruplarının bu hücumlara qarşı müqavimətini yüksək qiymətləndirib.

İslami Cihad Hərəkatının lideri İslam İnqilabının Rəhbəri Ayətullah Xamenei və İran Prezidentinə səmimi salamlarını çatdırıb və müqavimətin vəziyyəti haqqında məlumat verib.

Müqavimətin qurudakı vəziyyətini “əla” olaraq xarakterizə edən Nəhalə sionist rejimin Qəzzaya hücumları dayanana qədər müqavimətin davam edəcəyini bildirib və müqavimət şərtlərinin işğalçı rejim tərəfindən qəbul edilməsi lazım olduğunu vurğulayıb.

Qeyd edək ki, İranın xarici işlər naziri Əmir Abdullahiyan da İslami Müqavimət Hərəkatının (HƏMAS) Siyasi Bürosunun rəhbəri İsmayıl Haniyə ilə telefonla danışıb.