İranın Vyanadakı beynəlxalq təşkilatlardakı səfiri Kazım Qəribabadi

 Rasthaber Azərbaycan xəbər verir ki, İranın Vyanadakı beynəlxalq təşkilatlardakı səfiri Kazım Qəribabadi İsrailin nüvə arsenalı ilə bağlı göstərdiyi sükuta görə MAQATE-ni (Atom Enerjisi üzrə Beynəlxalq Agentlik) tənqid edib.

“Beynəlxalq ictimaiyyət və MAQATE sionist rejimin artıq yarıməsrdən çox olan fəaliyyətinə göz yumaraq onlara nəzarət etməyib”, – deyə o bildirib.

Qəriabadi bu bəyanatla İsrail təmsilçisinin MAQATE-nin 7 ay ərzində İranın nüvə fəaliyyətlərinə göz yumması ilə bağlı iddialarından sonra çıxış edib.

“Hər hansı bir yayılmama və silahsızlaşdırma paktına üzv olmayan rejim təmsilçisinin fikirləri olduqca cəfəngdir”, – deyə iranlı rəsmi əlavə edib.

“Əgər o, İranda MAQATE inspeksiyalarının olmamasından danışırsa, bu, öz-özlüyündə böyük yalandır, çünki İran bütün protokollara əməl edir. Nəzərə almaq lazımdır ki, beynəlxalq ictimaiyyət və MAQATE sionist rejimin nüvə arsenalı, döyüş başlıqları və fəaliyyətinə göz yumub”, – deyə Qəribadabi sonda qeyd edib.