İsrail dövlət televiziyası KAN-ın məlumatına görə, sionist İsraildə atəşkəsi pozan və Qəzzaya hücumlarını bərpa edən çoxlu sayda ehtiyat əsgər döyüşlərə qayıtmaqdan imtina edir.

Az.rasthaber.com xəbər verir ki, məlumatda qeyd olunub ki, sionist İsrail ordusunun tibb bölməsində onlarla ehtiyatda olan və polkovnik-leytenant rütbəli və ondan aşağı olan zabitlər Qəzzada döyüşə qayıtmaqdan imtina ediblər.

Sözügedən əsgərlər İsrailin atəşkəsi pozması və Qəzzaya hücumları yenidən başlatmasına qarşı mövqelərini əks etdirən məktub dərc ediblər.

Əsgərlər İsrail rəhbərliyini Qəzzada atəşkəs və əsir mübadiləsi razılaşmasının ikinci mərhələsinə keçməyə çağırıb və "beynəlxalq hüquqa zidd olaraq torpaqların ələ keçirilməsini və məskunlaşmasını rədd etdiklərini" bildiriblər.

Müharibənin "ağılsız" uzunluğunu tənqid edən əsgərlər, "hər iki tərəfin mülki əhaliyə və sosial quruluşa zərər verən müharibənin İsrail Dövlətinin gələcəyini təhlükə altına atdığını" qeyd ediblər.

Əsgərlərin bu münasibəti İsrailin atəşkəsi pozaraq Qəzzaya hücumlarını bərpa etməsinə etiraz kimi qiymətləndirilib.

İsraildə yüzlərlə ehtiyatda olan zabit və əsgər dünən Baş Qərargah rəisi Eyal Zamirə məktub yazaraq Qəzzaya hücumlardan narazı olduqlarını bildiriblər.

Ehtiyatda olan zabitlər və əsgərlər Baş Qərargah rəisi Zamirdən Qəzzaya hücumların hədəflərini dəqiq müəyyənləşdirməyi və hücumların nə vaxt bitəcəyi ilə bağlı dəqiq tarix təyin etməyi tələb etmişdilər.

İsrail dövlət televiziyası KAN məktubun "qeyri-adi" olduğunu qeyd edib.