İranın “Sürəyya” adlı yeni peyki Kaim-100 raketi ilə kosmosa uğurla buraxılıb.

Az.rasthaber.org xəbər verir ki, İran mediası “Sürəyya” peykinin Kaim-100 raketi ilə bu səhər kosmosa uğurla buraxıldığını bildirib.

Xəbərdə İnqilab Keşikçiləri Ordusunun buraxılışı uğurla həyata keçirdiyi və peykin yerdən 750 kilometr uzaqlıqdakı orbitə yerləşdirildiyi bildirilib.

Peykin buraxılış mərasimində İnqilab Keşikçiləri Ordusunun Baş Komandanı general-mayor Hüseyn Səlami, İnqilab Keşikçiləri Ordusu Aerokosmik Qüvvələrinin komandanı briqada generalı Əmir Əli Hacızadə və İran Kosmik Agentliyinin prezidenti Həsən Salariyə, bəzi hərbçilər və dövlət rəsmiləri iştirak ediblər.

İlk yerli istehsal peykini 2009-cu ilin fevralında kosmosa göndərən İran, Nur-1 adlı ilk hərbi peykini 2020-ci ilin aprelində kosmosa çıxarıb.

İran üçüncü hərbi kəşfiyyat peyki “Nur-3”ün 2023-cü ildə orbitə çıxarıldığını açıqlayıb.