İranın Atom Enerjisi Təşkilatının rəhbəri Məhəmməd İslami ölkəsinin nüvə proqramının hərbi əməliyyat və ya sanksiyalarla aradan qaldırıla bilməyəcəyini və istənilən hücuma “qətiyyətli və dağıdıcı” cavab verəcəklərini bildirib.

Az.rasthaber.com xəbər verir ki, ''Əl-Cəzirə'' telekanalına müsahibə verən İranın Atom Enerjisi Təşkilatının rəhbəri Məhəmməd İslami ölkəsinin nüvə proqramı ilə bağlı əhəmiyyətli bəyanatlar verib.

İranın Amerika Birləşmiş Ştatlarının birtərəfli sanksiyalarından sonra nüvə razılaşmasındakı öhdəliklərini dayandırdığına diqqət çəkən Məhəmməd İslami deyib: “Nüvə sazişindəki öhdəliklərimizin azaldılmasının tərsinə çevrilməsi sanksiyaların tam ləğvindən və Amerika Birləşmiş Ştatları və digər tərəflərin müqavilədəki öhdəliklərini yerinə yetirməsindən asılıdır”.

Beynəlxalq Atom Enerjisi Agentliyinə (MAQATE) təqdim edilən əlavə yoxlama imkanlarından biri olan bəzi obyektlərdəki təhlükəsizlik kameralarının bununla bağlı aradan qaldırıldığını xatırladan Məhəmməd İslami, tərəflərin müqavilədəki öhdəliklərini yerinə yetirəcəyi təqdirdə kameraların yenidən quraşdırılacağını qeyd edib.

Məhəmməd İslami İsrailin İranın nüvə obyektlərinə qarşı hücum təhdidlərinə toxunaraq deyib: "Nüvə proqramımız hərbi əməliyyat və ya sanksiyalarla dayandırıla bilməz. İstənilən hücuma "həlledici və dağıdıcı" şəkildə cavab veriləcək.

İranın Atom Enerjisi Təşkilatının rəhbəri bildirib ki, İsrailin İranın nüvə obyektlərinə hərbi hücum təhdidləri boşdur və buna gücü yoxdur.

İranın nüvə enerjisi sahəsində qonşuları ilə konstruktiv əməkdaşlığa hazır olduğunu bildirən Məhəmməd İslami ölkəsinin nüvə proqramı ilə bağlı “siyasi qarışıqlıq” adlandırdığı ittihamların bu il sona çata biləcəyini bildirib.