İran İslam Respublikası Cənubi Afrikanın Beynəlxalq Ədalət Məhkəməsində (ICJ) İsrailə qarşı qaldırdığı soyqırım iddiasını dəstəklədiyini açıqlayıb.

Az.rasthaber.org xəbər verir ki, İran Xarici İşlər Nazirliyinin yazılı açıqlamasına görə, İran Cənubi Afrikanın Fələstin xalqının müdafiəsi üçün beynəlxalq hüquqa əsaslanan “məsuliyyətli, cəsur və şərəfli” hərəkətini dəstəklədiyini bildirib.

Qəzzada törədilən cinayətlərin səbəbkarlarının məsuliyyətə cəlb edilməsi üçün beynəlxalq ictimaiyyəti güclü dəstək verməyə çağıran İran, İsrailin Qəzza zolağında fələstinlilərə qarşı soyqırım da daxil olmaqla bütün beynəlxalq qanunları pozan cinayətlər törətdiyini vurğulayıb.

Xarici İşlər Nazirliyi həmçinin Birləşmiş Millətlər Təşkilatının Təhlükəsizlik Şurası da daxil olmaqla beynəlxalq qurum və təşkilatları İsrailin Qəzzaya hücumlarını tamamilə dayandırmaq üçün təcili addımlar atmağa çağırıb.