Bu barədə məlumatı redaksiyamıza Hacı İlham Əliyevin Hüquqlarının İctimai Müdafiə Komitəsinin sədri Akif Heydərli bildirib.
Rasthaber Azərbaycan islamınsəsi saytına istinadən xəbər verir ki, məlumatda deyilir:
“Azərbaycan İslam Partiyasının sədr əvəzi, ilahiyyatçı alim Hacı İlham Əliyevin həbs müddəti oktyabrın 28-dək uzadılmışdır. İ.Əliyevin vəkili Osman Kazımovun bildirdiyinə görə, bu barədə qərar dünən Səbayil Rayon Məhkəməsində verilib.
Hazırda Hacı İlham Əliyev DTX-nın təcridxanasında saxlanılır. Onun istintaqı davam edir. Hacı İlhamın mənəvi-psixoloji durumu, səhhəti normal və qaydasındadır. İ.Əliyev ona qarşı irəli sürülən ittihamları qəbul etmir”.
Xatırladaq ki, Hacı İlham Əliyev 29.02.2020 tarixində günorta, saat 12-13 radələrində Dövlət Təhlükəsizliyi Xidmətinə (DTX) çağırılıb və Cinayət Məcəlləsinin 274-cü maddəsi ilə ittiham irəli sürülərək barəsində Səbail Rayon Məhkəməsinin qərarı ilə 4 aylıq həbs qəti imkan tədbiri seçilib.
Qeyd edək ki, ali ruhani təhsili alan İlham Əliyev siyasi fəaliyyətə 2016-cı ildən AİP-in sədr əvəzi kimi başlamışdır. Ailəlidir, iki azyaşlı övladı var."
