Tramp İsrail hücumundan narazılığını açıqladı
ABŞ prezidenti Donald Tramp İsrailin Beyrutun cənubundakı Dahiya bölgəsinə endirdiyi hava zərbələrinin Vaşinqtonla koordinasiya olunmadığını bildirib.
“Fox News”a danışan Tramp deyib ki, hücumlarla bağlı ABŞ və İsrail arasında koordinasiya olmayıb və o, baş verənlərdən narazıdır.
“Netanyahudan cavab verməməyi istəyəcəyəm”
“Axios” nəşrinin məlumatına görə, Tramp İsrailin baş naziri Benyamin Netanyahu ilə əlaqə saxlayaraq onu İranın raket hücumlarına cavab verməməyə çağıracağını bildirib.
İran həmin raket hücumlarını Beyrutun cənubuna edilən zərbələrə cavab olaraq həyata keçirdiyini açıqlamışdı.
“İranla razılaşmaya çox yaxınıq”
Tramp açıqlamasında ABŞ ilə İran arasında yekun razılaşmanın əldə olunmasına çox yaxın olduqlarını da vurğulayıb.
O bildirib ki, tərəflər yaxın günlərdə razılaşma imzalamağa yaxın idi, lakin son hadisələr vəziyyəti dəyişib.
“Vəziyyətin partlamasını istəmirəm”
ABŞ prezidenti İranı yenidən danışıqlar masasına qayıtmağa çağırıb.
Trampın sözlərinə görə, hazırkı mərhələdə əsas məqsəd bölgədə vəziyyətin genişmiqyaslı müharibəyə çevrilməsinin qarşısını almaqdır.
Gərginlik sürətlə artır
İranın sionist rejimə raket hücumları və Beyrutun cənubuna endirilən zərbələrdən sonra Qərbi Asiyada təhlükəsizlik vəziyyəti daha da gərginləşib.
Bölgədə diplomatik və hərbi proseslər diqqətlə izlənilir.
