Tramp: “Hörmüz açılmasa, güclü zərbə olacaq”
ABŞ Prezidenti Donald Tramp bildirib ki, Hörmüz boğazı yaxın vaxtlarda yenidən gəmiçilik üçün açılmalıdır. Onun sözlərinə görə, əks halda İran “çox güclü zərbə” ilə üzləşəcək.
Kaliforniya ştatına səfəri zamanı jurnalistlərə danışan Tramp qeyd edib ki, boğazın tezliklə açılacağına inanır. O vurğulayıb ki, əgər bu baş verməsə, ABŞ sərt addımlar ata bilər.
Prezident əlavə edib ki, tərəflər arasında müzakirələr davam edir və Tehran razılaşmaya nail olmaqda maraqlıdır.
Müvəqqəti razılaşma iddiası
Məlumatlara görə, ABŞ, İran və Oman arasında Hörmüz boğazında gəmiçiliyin təhlükəsiz bərpası ilə bağlı müvəqqəti razılaşma üzərində iş aparılır.
İddialara əsasən, razılaşma 60 günlük müddəti əhatə edəcək. Bu çərçivədə Fars körfəzinə daxil olan gəmilər şimal marşrutundan, çıxan gəmilər isə Oman ərazi sularından keçən cənub marşrutundan istifadə edəcək. Bildirilir ki, bu sistem üçün əlavə ödəniş nəzərdə tutulmur və müddətin sonradan uzadılması da mümkündür.
Tehran Vaşinqtonla danışıqları təkzib etdi
İran tərəfi isə ABŞ ilə Hörmüz boğazı məsələsində hər hansı birbaşa danışıqlar aparıldığını rədd edib.
İranın danışıqlar prosesinə yaxın mənbənin açıqlamasına görə, hazırda bu məsələ üzrə yeganə müzakirələr Tehran ilə Maskat arasında keçirilir və Vaşinqton bu prosesin iştirakçısı deyil.
Mənbə bildirib ki, İran əvvəldən ABŞ-nin yaratdığı cənub marşrutunu təhlükəsiz və hüquqi baxımdan qanuni hesab etmir. Rəsmi Tehran həmin marşrutun daimi status almasına yönəlmiş cəhdlərə qarşı olduğunu vurğulayıb.
“İslamabad Anlaşması” yenidən gündəmdə
Mənbənin sözlərinə görə, “İslamabad Anlaşması”nın 5-ci bəndinə əsasən, İran 60 gün müddətində Hörmüz boğazında təhlükəsiz gəmiçilik marşrutunun təmin edilməsinə cavabdehdir. Bu proses Oman və Fars körfəzi ölkələri ilə koordinasiya şəraitində həyata keçirilməlidir.
Qeyd olunub ki, ABŞ sonradan bu mexanizmdən kənar ayrıca marşrut yaradaraq gəmiləri həmin istiqamətə yönləndirib. İran isə bunu qəbul etmədiyini və boğazın idarə olunması ilə bağlı yalnız Omanla danışıqları davam etdirdiyini bəyan edir.
