86-cı hücum dalğası başladı
İranın “Xatəmül-Ənbiya” mərkəzi qərargahının sözçüsü İbrahim Zülfüqari “Sadiq Vəd 4” əməliyyatının 86-cı dalğasının başladığını açıqlayıb. Onun sözlərinə görə, əməliyyat İran silahlı qüvvələrinin davam edən hərbi fəaliyyətlərinin bir hissəsidir.
Bildirilib ki, hücumlar İranın Hərbi-Kosmik Qüvvələri və SEPAH-ın dəniz qüvvələri tərəfindən çoxmərhələli şəkildə həyata keçirilib.
ABŞ bazaları və hərbi infrastruktur hədəf alınıb
Açıqlamaya əsasən, hücumun ilk mərhələsində ABŞ-a məxsus hərbi bazalar və obyektlər vurulub. Bunlara İraqdakı “Viktori”, Küveytdəki “Ərifcan” və Səudiyyə Ərəbistanındakı “Əl-Xarc” bazaları daxildir.
Həmçinin hava əməliyyatları infrastrukturu, pilotsuz uçuş aparatları sistemləri və silah anbarlarının hədəfə alındığı qeyd olunur.
İşğal əraziləri və digər hədəflər
İkinci mərhələdə isə İsrailə aid obyektlərin və müxtəlif bölgələrdə yerləşən hərbi mövqelərin vurulduğu bildirilib. Hədəflər arasında Ərad, Nəqab, Tel-Əviv, Ərbil, ABŞ-ın Beşinci Donanması və BƏƏ-də yerləşən “Əl-Zafra” bazası göstərilir.
Eyni zamanda İordaniyadakı “Əzraq” bazasında ABŞ qüvvələrinin yerləşdiyi obyektlərin də hədəfə alındığı bildirilir
Hərbi texnikanın məhv edildiyi bildirilir
İran tərəfi hücumlar nəticəsində ABŞ-a məxsus strateji təyyarənin – “E-3G AWACS” tipli hava nəzarət təyyarəsinin tam məhv edildiyini açıqlayıb. Bundan əvvəl isə həmin bazada yanacaq doldurma təyyarəsinin də vurulduğu bildirildi.
Bildirilib ki, bu zərbələr nəticəsində ətrafdakı digər hərbi texnikalara da ciddi ziyan dəyib.
PUA-ların vurulması və müdafiə əməliyyatları
Açıqlamada qeyd olunur ki, İranın hava hücumundan müdafiə sistemləri də aktiv olub. Luristan vilayətinin Xürrəmabad bölgəsində iki “Orbiter” tipli pilotsuz aparatın vurulduğu bildirilib.
Bundan əlavə, Hörmüz boğazının şərqində ABŞ-a məxsus digər pilotsuz uçuş aparatının da məhv edildiyi qeyd olunur.
Daha sərt zərbələr vəd edilir
Zülfüqari çıxışının sonunda bildirib ki, İran silahlı qüvvələri növbəti mərhələlərdə daha güclü və dağıdıcı zərbələr endirəcək. O vurğulayıb ki, İran xalqının dəstəyi ilə əməliyyatlar davam etdiriləcək.
İran tərəfi həmçinin xəbərdarlıq edib ki, region ölkələrinin ərazisindən istifadə edilərək həyata keçirilən hücumlar həmin ərazilərdəki ABŞ bazalarını da hədəfə çevirəcək.
