Nazirlər Kabineti təklifi yekdilliklə qəbul etdi
Sionist rejim hökuməti Birinci Dünya müharibəsi illərində Osmanlı imperiyasında ermənilərə qarşı baş verən hadisələrin “erməni soyqırımı” kimi tanınmasına dair qərar qəbul edib.
İşğalçı İsrailin xarici işlər naziri Gideon Saar tərəfindən təqdim olunan təşəbbüs Nazirlər Kabinetinin iclasında yekdilliklə təsdiqlənib. Xarici İşlər Nazirliyi qəbul edilən qərarı “tarixi addım” kimi qiymətləndirib.
Bununla belə, qərarın hüquqi qüvvəyə minməsi üçün sionist rejim parlamenti – Knesset tərəfindən də təsdiqlənməsi tələb olunur.
Saar: “Bu, mənəvi və tarixi öhdəlikdir”
Nazirlər Kabinetində çıxış edən Gideon Saar bildirib ki, ermənilərə qarşı baş vermiş hadisələrin inkar edilməsi və ya kiçildilməsi cəhdləri bu gün də davam edir.
Nazirin sözlərinə görə, İsrail yəhudi dövləti kimi bu məsələ ilə bağlı rəsmi mövqe ortaya qoymalıdır.
Saar qeyd edib ki, bu addım mənəvi və tarixi məsuliyyətin yerinə yetirilməsi baxımından vacibdir və “doğru qərar vermək üçün heç vaxt gec deyil”.
Qərar Türkiyə–İsrail münasibətlərinə təsir göstərə bilər
Müşahidəçilər hesab edirlər ki, bu qərar İsrail və Türkiyə arasında onsuz da gərgin olan münasibətlərə əlavə təsir göstərə bilər.
Əvvəlki sionist rejim hökumətləri Türkiyə ilə strateji əlaqələri nəzərə alaraq bu hadisələri rəsmi şəkildə “soyqırımı” kimi tanımaqdan yayınırdılar.
Lakin 2023-cü ilin oktyabrında Qəzzada müharibənin başlamasından sonra Ankara və Təl-Əviv arasında münasibətlər daha da kəskinləşib.
Türkiyə İsraili Qəzzada fələstinlilərə qarşı soyqırımı törətməkdə ittiham edir, İsrail isə bu ittihamları rədd edir.
Saar: “Bu qərar Türkiyəyə qarşı cavab deyil”
Sionist rejimin xarici işlər naziri qərarın Türkiyənin İsrailə qarşı siyasətinə cavab xarakteri daşımadığını bildirib.
Onun sözlərinə görə, Türkiyənin sionist rejim əleyhinə mövqeyi tarixi hadisələrin qiymətləndirilməsinə təsir göstərməməlidir.
Buna baxmayaraq, analitiklər qərarın Ankara ilə Təl-Əviv arasında diplomatik gərginliyi daha da artıracağını istisna etmirlər.
1915 hadisələri ilə bağlı fərqli mövqelər qalır
1915–1916-cı illərdə Osmanlı imperiyasında yaşayan ermənilərin Suriya və İraq istiqamətində köçürülməsi zamanı yüz minlərlə insan həyatını itirib.
Ermənistan və bir sıra ölkələr, həmçinin çoxsaylı tarixçilər bu hadisələri “soyqırımı” kimi qiymətləndirirlər.
Türkiyə isə həmin dövrdə qəbul edilən köçürmə qərarının Birinci Dünya müharibəsinin ağır şəraitində təhlükəsizlik məqsədilə verildiyini bildirir, kütləvi insan itkilərini qəbul etsə də, hadisələrin “soyqırımı” kimi qiymətləndirilməsinə qarşı çıxır.
Hazırda dünyanın 30-dan çox dövləti parlament səviyyəsində 1915-ci il hadisələrini “erməni soyqırımı” kimi tanıyıb.
