Qalibaf: “Ya hamı, ya da heç kim”
İran parlamentinin (Şura Məclisi) sədri Məhəmməd Baqir Qalibaf “X” sosial şəbəkəsində paylaşdığı açıqlamada müharibənin yeni mərhələsinin qaydalarını sərt ifadələrlə təsvir edib.
O bildirib ki, hazırkı qarşıdurmanın əsas prinsipi “ya hamı, ya da heç kim” yanaşmasıdır.
“İran neft sata bilməsə, başqaları da sata bilməyəcək”
Qalibaf vurğulayıb ki, İranın neft ixracına maneələr yaradılacağı halda bölgədə başqa ölkələrin də neft satışı təhlükə altına düşəcək.
Onun sözlərinə görə, “bizim neft sata bilmədiyimiz bir bölgədə heç kim neft sata bilməyəcək”.
İranlı siyasətçi əlavə edib ki, ölkəsinin təhlükəsizliyi təmin olunmasa, regiondakı enerji infrastrukturu da təhlükəsiz hesab edilə bilməz.
Hörmüz boğazı ilə bağlı yeni xəbərdarlıq
Qalibaf bildirib ki, Hörmüz boğazında təhlükəsizliyin təmin olunması yalnız ABŞ hərbi qüvvələrinin bölgədən çıxacağı təqdirdə mümkün ola bilər.
O, həmçinin vurğulayıb ki, müharibədən əvvəlki vəziyyətə qayıdış artıq mümkün deyil və Hörmüz boğazında yeni reallıq formalaşıb.
Vilayətidən Ağ Evə xəbərdarlıq
İranın ali rəhbərinin siyasi və beynəlxalq məsələlər üzrə müşaviri Əli Əkbər Vilayəti də məsələ ilə bağlı açıqlama verərək ölkəsinin yeni çəkindirmə mərhələsinə daxil olduğunu bildirib.
Vilayəti qeyd edib ki, İrana qarşı aşağı maliyyətli və ya məhdud nəticəli hərbi zərbə endirməyin mümkün olduğunu düşünənlər yanılır.
Onun sözlərinə görə, ABŞ administrasiyası anlamalıdır ki, İrana qarşı təhdidlər, regional müttəfiqlərin səfərbər edilməsi və Avropa dəstəyinin gücləndirilməsi bölgədə təhlükəsizliyi artırmayacaq.
Gərginlik davam edir
Bu açıqlamalar ABŞ-nin son günlər İran ərazisinə endirdiyi zərbələr və tərəflər arasında qarşılıqlı hərbi əməliyyatların davam etdiyi bir vaxta təsadüf edir.
İran rəsmiləri bildirirlər ki, ABŞ-nin hücumlarına cavab olaraq ölkənin silahlı qüvvələri bölgədəki ABŞ hərbi bazalarını və Vaşinqtonun hərbi maraqları ilə əlaqəli obyektləri hədəfə almağa davam edir.
