Qəzzada itkilərin sayı artır
Qəzza Səhiyyə Nazirliyinin yaydığı məlumata görə, sionist rejim ordusunun 2023-cü ilin oktyabr ayından bəri Qəzza zolağına həyata keçirdiyi hərbi əməliyyatlar nəticəsində 73 076 nəfər şəhid olub, 173 537 nəfər isə yaralanıb.
Nazirliyin açıqlamasında bildirilir ki, son 24 saat ərzində xəstəxanalara, ikisi dağıntılar altından çıxarılan olmaqla, 4 nəfərin meyiti, həmçinin 12 yaralı gətirilib.
Atəşkəsdən sonra da hücumlar davam edib
Məlumata görə, 10 oktyabr 2025-ci ildə qüvvəyə minən atəşkəsdən sonra işğalçı İsrailin hücumları nəticəsində 1 059 nəfər şəhid olub, 3 429 nəfər yaralanıb.
Bundan əlavə, dağıntılar altından 788 nəfərin meyitinin çıxarıldığı bildirilib.
Qəzza rəsmiləri qeyd edirlər ki, dağıntılar altında hələ də minlərlə insanın cəsədinin qaldığı ehtimal olunur.
Nuseyratda PUA hücumu
Fələstinin rəsmi WAFA agentliyinin məlumatına görə, sionist rejimə məxsus pilotsuz uçuş aparatı Nuseyrat Qaçqınlar Düşərgəsində motosikleti hədəfə alıb.
Hücum nəticəsində 7 fələstinli yaralanıb, onlardan birinin vəziyyətinin ağır olduğu bildirilir. Yaralılar Əl-Avdə Xəstəxanasına çatdırılıb.
Xan Yunisdə iki nəfər şəhid olub
İsrail ordusunun Qəzza zolağının cənubundakı Xan Yunis şəhərinin Məvasi bölgəsinə pilotsuz uçuş aparatı ilə endirdiyi digər zərbə nəticəsində 2 fələstinli şəhid olub, çox sayda insan isə yaralanıb.
Yerli səhiyyə mənbələrinin məlumatına görə, yaralıların müalicəsi davam etdirilir.
