Mossaddan Şam rəhbərliyinə Türkiyə sualları
Sionist rejimin xarici kəşfiyyat qurumu Mossadın rəhbəri Roman Qofmanın Suriya xarici işlər naziri Əsəd Həsən Şeybani ilə telefon danışığında Türkiyənin bölgədəki hərbi fəaliyyətini gündəmə gətirdiyi iddia olunur.
Məlumata görə, avqustun 14-də baş tutduğu bildirilən gizli telefon danışığında Tel-Əviv rəhbərliyinin Ankara ilə Dəməşq arasında inkişaf edən hərbi və siyasi əməkdaşlıqdan narahatlıq keçirdiyi qeyd edilir.
Sionist rejim tərəfinin əsas suallarının Türkiyənin Suriyadakı hərbi mövcudluğu, silah dəstəyi və pilotsuz uçuş aparatları ilə bağlı olduğu irəli sürülür.
Tel-Əvivin diqqətində Ankara-Dəməşq yaxınlaşması
İddialara görə, Mossad rəhbəri Şam rəhbərliyindən Türkiyənin Suriyadakı hərbi qüvvələrinin səviyyəsi və gələcək planları barədə məlumat almağa çalışıb.
Görüşdə aşağıdakı məsələlərin müzakirə edildiyi bildirilir:
- Türkiyənin Suriyadakı hərbi iştirakının genişlənib-genişlənmədiyi;
- Suriya ordusuna Türkiyə tərəfindən silah və hərbi texnika verilib-verilmədiyi;
- Türk istehsalı pilotsuz uçuş aparatlarının Suriyaya tədarük olunub-olunmadığı;
- Ankara ilə Dəməşq arasındakı hərbi əməkdaşlığın sərhədləri.
Bu mövzuların gündəmə gəlməsi işğalçı İsrailin Suriya ərazisində Türkiyənin artan təsirini yaxından izlədiyi iddialarını gücləndirib.
Əbu Zuhur bazasına hücum öncəsi diqqətçəkən təmas
Məlumata görə, bu telefon danışığı sionist rejimin Suriyanın şimalındakı Əbu Zuhur hərbi hava bazasına hücumundan qısa müddət əvvəl baş verib.
Həmin hücumdan sonra rejim tərəfi Suriyada təhlükəsizlik narahatlıqları olduğunu açıqlamışdı. Türkiyə isə bu addımları tənqid edərək Suriyanın suverenliyinə zərbə kimi qiymətləndirmişdi.
Ankara ilə Şam arasında son dövrdə inkişaf edən əlaqələrin sionist rejimin regional hesablamalarına təsir etdiyi bildirilir.
ABŞ bölgədə gərginliyin qarşısını almağa çalışır
Artan gərginlik fonunda ABŞ diplomatiyasının da prosesə müdaxilə etdiyi qeyd olunur.
ABŞ-ın Türkiyə səfiri və Suriya-İraq üzrə xüsusi nümayəndəsi Tom Barrak İsrailin Əbu Zuhur hərbi bazasına hücumunu “regional sabitliyə xidmət etməyən lazımsız gərginlik” kimi qiymətləndirib.
Vaşinqtonun İsrail, Türkiyə və Suriya arasında mümkün qarşıdurmaların qarşısını almaq üçün tərəflər arasında məlumat mübadiləsinə əsaslanan mexanizm yaratmağa çalışdığı bildirilir.
