Məhkəmə hökmü elan etdi
Mayın 22-də Bakı Ağır Cinayətlər Məhkəməsində hazırda həbsdə olan siyasətçi Anar Əsədli barəsində hökm elan olunub.
Prosesə hakim Elnur Nuriyev sədrlik edib.
Məhkəmənin qərarına əsasən, fəaliyyəti dayandırılmış Azərbaycan Yüksəliş Partiyasının (AY Partiya) keçmiş sədri Anar Əsədli 4 il 6 ay müddətinə azadlıqdan məhrum edilib.
Cinayət işi yenidən istintaqa qaytarılmışdı
Anar Əsədli ilk dəfə 2023-cü il aprelin 21-də həbs olunmuşdu. Daha sonra həmin ilin iyul ayında onun barəsində seçilmiş həbs qətimkan tədbiri dəyişdirilərək ev dustaqlığı ilə əvəz edilmişdi.
Xitam qərarı sonradan ləğv olunub
Bir müddət sonra onun barəsində açılmış cinayət işinə xitam verilsə də, sonradan Baş Prokurorluq həmin qərarı ləğv edib.
Bunun ardınca Anar Əsədliyə qarşı irəli sürülən dələduzluq ittihamı üzrə materiallar yenidən istintaqa qaytarılıb və araşdırmalar davam etdirilib.
İttiham və zərərçəkənlərin mövqeyi
İttihama görə, Anar Əsədli dörd nəfərə qarşı dələduzluq əməlində təqsirləndirilib.
Tanınmış şəxslər zərərçəkmiş qismində tanınıb
Zərərçəkmiş qismində tanınan şəxslər arasında Azərbaycanın sabiq prezidenti Əbülfəz Elçibəyin keçmiş köməkçisi Oqtay Qasımov, Zəngilan rayonunun sabiq icra başçısı İlham Hüseynov və digər şəxslərin olduğu bildirilib.
Məlumata görə, zərərçəkən tərəf dəymiş ziyanın ödənilmədiyini əsas gətirərək məhkəməyə Anar Əsədli barəsində həbs tədbirinin seçilməsi ilə bağlı vəsatət təqdim etmişdi və bundan sonra o yenidən həbs olunmuşdu.
Əsədli ittihamları qəbul etməyib
Anar Əsədli məhkəmə prosesi ərzində ona qarşı irəli sürülən dələduzluq ittihamlarını qəbul etməyib.
O bildirib ki, heç kimin vəsaitini mənimsəməyib və hadisələrin yanlış anlaşılma nəticəsində bu mərhələyə gəlib çıxdığını düşünür.
Partiyanın fəaliyyəti də dayandırılmışdı
Anar Əsədli həbsdə olduğu müddətdə rəhbərlik etdiyi Azərbaycan Yüksəliş Partiyası fəaliyyətini dayandırdığını açıqlamışdı.
