İşğalçı İsrail Türkiyə ilə gizli danışıqlar aparır
İşğalçı İsrail təhlükəsizlik rəsmisi Türkiyə ilə Suriya ərazisində mümkün qarşıdurmaların qarşısını almaq üçün gizli təmasların həyata keçirildiyini açıqlayıb.
İşğalçı İsrail yayım qurumunun məlumatına görə, adı açıqlanmayan təhlükəsizlik rəsmisi Təl-Əvivin Ankara ilə “toqquşmaların qarşısını almaq” məqsədilə əlaqə saxladığını bildirib.
Bu açıqlama işğalçı İsrailin avqustun 18-də İdlibdə yerləşən Əbu əz-Zuhur hərbi hava bazasına endirdiyi hava zərbələrindən sonra gündəmə gəlib.
Netanyahu hökuməti Türkiyəni hədəf almışdı
İşğalçı İsrailin baş naziri Binyamin Netanyahu daha əvvəl hava hücumlarını əsaslandıraraq Suriyanın təhlükəsizlik razılaşmalarını pozmaq üzrə olduğunu iddia etmişdi.
Netanyahunun ofisindən verilən açıqlamada Suriyanın hava bazasında Türkiyə qüvvələrinin yerləşdirilməsinin işğalçı İsrail üçün təhlükə yaratdığı irəli sürülmüş və Təl-Əvivin buna qarşı addımlar atacağı bildirilmişdi.
Netanyahu həmçinin Türkiyənin bölgədə sabitliyi pozmağa çalışdığını iddia edərək işğalçı İsrailin bu cür addımlara qarşı mübarizə aparacağını söyləmişdi.
Ankara işğalçı İsrailin iddialarını rədd edib
Türkiyə isə işğalçı İsrail tərəfinin açıqlamalarını qəbul etməyib.
Ankara bu iddiaların Suriyanın suverenliyinə və ərazi bütövlüyünə qarşı həyata keçirilən hava hücumlarına bəraət qazandırmaq məqsədi daşıdığını bildirib.
Türkiyə Müdafiə Nazirliyi daha əvvəl açıqlama verərək Suriyanın hərbi imkanlarının inkişafına dəstək göstərildiyini, lakin hücuma məruz qalan Əbu əz-Zuhur bazasında hücumdan əvvəl və ya hücum zamanı heç bir türk hərbi heyətinin olmadığını açıqlayıb.
Ankara-Təl-Əviv gərginliyi artır
Türkiyə Prezident Administrasiyasının Kommunikasiya İdarəsinin rəhbəri Burhanəddin Duran isə bildirib ki, Ankara işğalçı İsrail baş naziri Binyamin Netanyahunun bölgədə sabitliyi pozan fəaliyyətlərinə qarşı mövqeyini davam etdirəcək.
Duran Türkiyənin təhlükəsizliyinə yönələn təhdidlərə və bölgədə gərginliyin artırılmasına imkan verməyəcəyini vurğulayıb.
Ekspertlərə görə, Suriya üzərində artan hərbi fəallıq işğalçı İsrail və Türkiyənin bölgədəki maraqlarının daha çox qarşılaşmasına səbəb ola bilər. Gizli əlaqə kanallarının yaradılması isə tərəflər arasında birbaşa toqquşma riskini azaltmaq cəhdi kimi qiymətləndirilir.
