İran ABŞ-ni razılaşmanı pozmaqda ittiham etdi
İran Xarici İşlər Nazirliyi bəyan edib ki, ABŞ ordusu ölkənin cənub sahillərində yerləşən bir sıra müşahidə və nəzarət məntəqələrinə hərbi zərbələr endirib.
Rəsmi Tehran Vaşinqtonun son əməliyyatlarını qətiyyətlə pisləyərək bildirib ki, ABŞ-nin təkrarlanan hücumları tərəflər arasında əldə olunmuş razılaşmanın əsas müddəalarını faktiki olaraq qüvvədən salıb.
Nazirlik vurğulayıb ki, bu hücumlar BMT Nizamnaməsinin 2-ci maddəsinin 4-cü bəndinin, eləcə də hərbi əməliyyatların dayandırılmasını nəzərdə tutan memorandumun birinci bəndinin açıq şəkildə pozulmasıdır.
“İran təhlükəsizliyini qorumaqdan çəkinməyəcək”
Xarici İşlər Nazirliyi bəyan edib ki, İran Silahlı Qüvvələri ölkənin milli təhlükəsizliyini qorumaq üçün bütün zəruri addımları atacaq.
Açıqlamada bildirilib ki, İrana qarşı istənilən hücumun mənbəyi və təşkilatçıları hədəf alınacaq.
Tehran həmçinin bəyan edib ki, İrana qarşı hərbi təcavüzdə iştirak edən və ya buna şərait yaradan istənilən tərəf beynəlxalq hüquqa görə məsuliyyət daşıyacaq.
BMT-yə çağırış
İran Xarici İşlər Nazirliyi BMT Təhlükəsizlik Şurasını və BMT-nin Baş katibini regional və beynəlxalq sülhün qorunması istiqamətində üzərlərinə düşən öhdəlikləri yerinə yetirməyə çağırıb.
Nazirlik ölkənin BMT Nizamnaməsinin 51-ci maddəsinə uyğun olaraq öz ərazi bütövlüyünü və suverenliyini müdafiə etmək hüququna malik olduğunu vurğulayıb.
İran ABŞ bazalarına cavab zərbələri endirdiyini açıqlayıb
İran tərəfi ABŞ-nin son hücumlarına cavab olaraq Bəhreyndə yerləşən Şeyx İsa aviabazasındakı ABŞ qüvvələrinin toplandığı məntəqələri hədəf aldığını bildirib.
Bununla yanaşı, İran İnqilab Keşikçiləri Korpusu Hərbi Dəniz Qüvvələri və Aerokosmik Qüvvələrinin birgə əməliyyatı nəticəsində Bəhreyndə yerləşən hərbi obyektlərə, Bəndər Salman limanı ətrafındakı ABŞ hərbi infrastrukturuna, eləcə də Küveytdəki Əli əs-Səlim aviabazasına raket və pilotsuz uçuş aparatları ilə zərbələr endirildiyi açıqlanıb.
