Elektrik stansiyası 4 gün iflic oldu
Böyük Britaniyada enerji sektoruna qarşı həyata keçirilən kiberhücum təhlükəsizlik narahatlıqlarını artırıb.
İranla əlaqəli olduğu irəli sürülən haker qruplarının kiçik həcmli elektrik istehsal müəssisəsinə hücum etdiyi və stansiyanın dörd gün ərzində fəaliyyətini dayandırmasına səbəb olduğu bildirilib.
Britaniya mətbuatının məlumatına görə, hücum ötən ay baş verib və hadisə ölkənin kritik infrastrukturunun kibertəhlükələr qarşısındakı vəziyyətini yenidən gündəmə gətirib.
“İran bağlantısı” iddiası araşdırılır
Hücumun arxasında İranla əlaqəli hakerlərin olduğu iddiası Britaniya təhlükəsizlik qurumları tərəfindən araşdırılır.
Hadisənin İran və İngiltərə arasında gərginliyin artdığı bir vaxtda baş verməsi xüsusi diqqət çəkib.
Mütəxəssislər enerji sistemləri kimi strateji sahələrə yönələn kiberhücumların yalnız texniki problem deyil, həm də milli təhlükəsizlik məsələsi olduğunu bildirirlər.
London: Böyük enerji sisteminə təhlükə yaranmadı
Böyük Britaniyanın Enerji Təhlükəsizliyi və Sıfır Emissiya Nazirliyi hadisənin ölkənin ümumi enerji təchizatına təsir etmədiyini açıqlayıb.
Nazirliyin nümayəndəsi bildirib ki, hücum yalnız kiçik enerji istehsalçısına təsir göstərib və daha geniş enerji şəbəkəsi üçün risk yaranmayıb.
Bununla yanaşı, Britaniya hökuməti enerji infrastrukturunun qorunması üçün təhlükəsizlik tədbirlərinin gücləndirildiyini açıqlayıb.
ABŞ-İran qarşıdurması fonunda yeni gərginlik
Kiberhücum iddiası ABŞ və İran arasında artan qarşıdurma fonunda baş verib.
İngiltərə ABŞ-nin İrana qarşı hərbi əməliyyatlarında istifadə etdiyi bəzi bazalara ev sahibliyi edir. London hücum əməliyyatlarında iştirak etmədiyini bildirsə də, Vaşinqtonla hərbi əməkdaşlığını davam etdirir.
İran İnqilab Keşikçiləri Korpusu isə daha əvvəl İran ərazisinə qarşı istifadə edilən istənilən xarici hərbi bazanın hədəf sayılacağını açıqlamışdı.
Enerji infrastrukturu yeni hədəfə çevrilir
Son hadisə dünya ölkələrinin kritik enerji obyektlərinin kiberhücumlardan qorunması məsələsini yenidən ön plana çıxarıb.
Britaniya təhlükəsizlik qurumları araşdırmaların davam etdiyini bildirərkən, hadisənin arxasında kimlərin dayandığı ilə bağlı yekun nəticə açıqlanmayıb.
