Leysan yağışları can aldı
Hindistanda cənub-qərb musson yağışları ölkənin bir sıra bölgələrində həyatı iflic edib.
Rəsmi məlumata görə, Cammu və Kəşmir bölgəsində güclü yağışların yaratdığı sel və torpaq sürüşmələri nəticəsində azı 11 nəfər həyatını itirib. Bundan əlavə, bir neçə nəfərin itkin düşdüyü bildirilir.
İldırım və daşqınlar da itkilərə səbəb olub
Uttarakhand ştatında ildırım vurması nəticəsində iki nəfər ölüb. Güclü yağışlar səbəbindən bölgədə çoxsaylı avtomobil yolları nəqliyyatın hərəkəti üçün bağlanıb.
Naqaland ştatında isə daşqınlar nəticəsində üç nəfər həlak olub. Sel suları çoxsaylı evlərə ziyan vurub, bəzi şəxslərin dağıntılar altında qaldığı bildirilir.
Axtarış-xilasetmə əməliyyatları davam edir
Yerli hakimiyyət orqanları itkin düşən şəxslərin axtarışı və zərərçəkənlərin təxliyəsi istiqamətində əməliyyatların davam etdiyini açıqlayıb.
Yeni yağış xəbərdarlığı edilib
Hindistan Meteorologiya Departamenti (IMD) ölkənin şimal və şərq bölgələrində güclü yağışların yaxın günlərdə də davam edəcəyi barədə xəbərdarlıq yayıb.
Qurum əhaliyə ehtiyatlı olmağı, riskli ərazilərdən uzaq durmağı və rəsmi xəbərdarlıqlara əməl etməyi tövsiyə edib.
