Prezident seçkilərinin tarixi açıqlanıb
Fransa hökuməti növbəti prezident seçkilərinin ilk turunun 18 aprel 2027-ci il tarixində keçiriləcəyini elan edib.
Nazirlər Kabinetinin iclasından sonra hökumətin sözçüsü Mod Brejon bildirib ki, namizədlərdən heç biri ilk turda mütləq səs çoxluğu qazanmasa, seçkilərin ikinci turu 2 may 2027-ci ildə təşkil olunacaq.
Makron yenidən namizəd ola bilməyəcək
Fransa Prezidenti Emmanuel Makron 2017-ci ildə ilk dəfə dövlət başçısı seçilib, 2022-ci ildə isə ikinci müddətə yenidən bu vəzifəyə seçilib.
Fransa Konstitusiyasına əsasən, eyni şəxs ardıcıl üç prezidentlik müddəti üçün namizədliyini irəli sürə bilmədiyindən Makron 2027-ci il seçkilərində iştirak edə bilməyəcək.
Sağçılar seçki yarışında önə çıxır
İctimai rəy sorğuları prezident seçkiləri öncəsi əsas üstünlüyün ifrat sağçı Milli Birlik Partiyasının namizədlərində olduğunu göstərir.
Sorğulara əsasən, həm Marin Le Pen, həm də Jordan Bardella seçki yarışının favoritləri sırasında yer alırlar.
Lakin Marin Le Penin namizədliyi hələ də hüquqi qeyri-müəyyənliklə üz-üzədir. Gələn həftə apellyasiya məhkəməsinin onun beş il müddətinə seçkili vəzifələrə namizəd olmasının qadağan edilməsinə dair qərardan verilmiş şikayət üzrə hökmü açıqlanacaq.
Le Pen Avropa Parlamentinin vəsaitlərindən qanunsuz istifadə işi üzrə təqsirli bilinib. O, qadağa qüvvədə qalacağı təqdirdə, partiyanın sədri Jordan Bardellanın prezident seçkilərində namizəd olacağını bəyan edib.
Digər namizədlər də seçkiyə hazırlaşır
2027-ci il prezident seçkilərində iştirak etmək niyyətini açıqlayan siyasətçilərin sayı da artır.
Onların arasında Emmanuel Makron hökumətlərində baş nazir olmuş Eduar Filip və Qabriel Attal da var.
Mühafizəkar Respublikaçılar Partiyası isə prezident seçkilərində Bruno Retayonu namizəd göstərib.
Radikal sol düşərgənin lideri Jan-Lük Melanşon da dördüncü dəfə Fransa prezidentliyinə namizəd olacağını açıqlayıb.
Siyasi müşahidəçilərin fikrincə, Makronun yarışdan kənarda qalması 2027-ci il prezident seçkilərini son illərin ən gərgin və rəqabətli siyasi mübarizəsinə çevirə bilər.
