Ailə Ələsgər Məmmədlinin vəziyyətindən narahatdır
Həbsdə olan “Toplum TV”nin həmtəsisçisi, media eksperti və hüquqşünas Ələsgər Məmmədlinin səhhəti ilə bağlı yenidən ciddi narahatlıq yaranıb.
Qardaşı, politoloq Nəsimi Məmmədlinin sözlərinə görə, Ələsgər Məmmədli yüksək arterial təzyiq, şəkərli diabet və mütəmadi təkrarlanan şiddətli baş ağrılarından əziyyət çəkir. Ailə onun ürək-damar sistemindəki mümkün problemin müəyyənləşdirilməsi üçün daha ətraflı müayinələrin, o cümlədən angioqrafiyanın aparılmasını istəyir.
Nəsimi Məmmədli bildirib ki, avqustun 11-də qardaşı ilə görüşərkən onun vəziyyətinin yaxşı olmadığını müşahidə edib. Onun sözlərinə görə, Ələsgər Məmmədlinin rəngi solğun olub, yorğun və təngnəfəs görünüb. Nəbzinin isə dəqiqədə 120-dən çox olduğu bildirilib.
Şiddətli baş ağrılarının təkrarlandığı deyilir
Ailənin məlumatına görə, Ələsgər Məmmədlinin arterial təzyiqində tez-tez dəyişiklik baş verir. Həftənin dörd-beş günü şiddətli baş ağrılarının yarandığı, bəzi hallarda ağrının bütün gün davam etdiyi bildirilir.
Nəsimi Məmmədli deyib ki, baş ağrıları yalnız həkimin təyin etdiyi ağrıkəsici dərmanların qəbulundan sonra zəifləyir.
Bununla yanaşı, ailə Ələsgər Məmmədlinin ürəyində də problem ola biləcəyindən narahatdır.
Təcridxanada vəziyyətinin kəskin pisləşdiyi bildirilir
Nəsimi Məmmədlinin sözlərinə görə, iyul ayında keçirilən məhkəmə iclaslarından birində qardaşının səhhəti qəfil pisləşib. Buna görə məhkəmə prosesi dayandırılıb və həkim çağırılıb.
Oxşar hadisənin avqustun 9-da 1 saylı Bakı İstintaq Təcridxanasında da baş verdiyi bildirilir.
Ələsgər Məmmədlinin ailəsinə danışdığına görə, o, kamerada kitab oxuduqdan sonra su götürmək üçün ayağa qalxarkən qəfil sinəsində güclü zərbəyə bənzər hiss keçirib, başı gicəllənib və müvazinətini itirib. Yıxılmamaq üçün əvvəlcə dizləri üstünə çökdüyü, daha sonra isə yerə yıxıldığı bildirilir.
Digər şəxslərin köməyi ilə onun çarpayıya uzadıldığı qeyd olunur.
“Sənəd versəm, işimi itirərəm”
Nəsimi Məmmədlinin bildirdiyinə görə, avqustun 10-da Ədliyyə Nazirliyinin Baş Tibb İdarəsindən gələn həkimlər Ələsgər Məmmədlini müayinə ediblər.
Ailənin iddiasına əsasən, həkimlərdən biri təcridxana şəraitində ürəklə bağlı problemin tam müəyyənləşdirilməsinin mümkün olmadığını və əlavə müayinənin kənarda aparılmalı olduğunu bildirib.
Ələsgər Məmmədlinin bununla bağlı rəsmi tibbi sənəd istədiyi, lakin həkimin belə sənəd təqdim edə bilməyəcəyini söylədiyi iddia olunur. Nəsimi Məmmədlinin qardaşına istinadən bildirdiyinə görə, həkim sənəd verəcəyi təqdirdə işini itirə biləcəyini deyib.
Ailə məhz tam tibbi müayinənin aparılmamasını əsas problemlərdən biri hesab edir.
Ailə Ədliyyə Nazirliyindən müdaxilə gözləyir
Avqustun 11-də Ələsgər Məmmədlidən qan nümunələrinin götürüldüyü və ürəyinin exokardioqrafik müayinəsinin aparıldığı bildirilir. Ailə indi Baş Tibb İdarəsinin hansı qərarı verəcəyini gözləyir.
Nəsimi Məmmədli hesab edir ki, vəziyyətin yalnız təcridxana səviyyəsində həlli mümkün deyil və Ədliyyə Nazirliyinin məsələyə müdaxiləsi lazımdır.
Ailə hazırda əsas məqsədin Ələsgər Məmmədlinin sağlamlığının və həyatının qorunması olduğunu bildirir.
Məmmədli 14 il müddətinə azadlıqdan məhrum edilib
Ələsgər Məmmədlinin səhhəti ilə bağlı narahatlıqlar daha əvvəl də ailəsi və vəkilləri tərəfindən gündəmə gətirilib. Onun qalxanabənzər vəzində düyün və törəmələrin olduğu, əlavə tibbi müayinələrə ehtiyac duyulduğu bildirilib.
Vəkillərin onun ev dustaqlığına buraxılması ilə bağlı qaldırdıqları vəsatətlər isə məhkəmələr tərəfindən təmin edilməyib.
Ələsgər Məmmədli 8 mart 2024-cü ildə “Toplum TV işi” çərçivəsində saxlanılıb. Ona əvvəlcə qaçaqmalçılıq, daha sonra qanunsuz sahibkarlıq, cinayət yolu ilə əldə edilmiş vəsaitlərin leqallaşdırılması, vergidən yayınma və əmək müqaviləsi bağlamadan işçilərin çalışdırılması ilə bağlı ittihamlar irəli sürülüb.
Məmmədli ittihamları qəbul etmir və həbsinin siyasi motivli olduğunu bildirir. Bakı Ağır Cinayətlər Məhkəməsi 27 iyul 2026-cı ildə onu 14 il müddətinə azadlıqdan məhrum edib. Həmin gün “Toplum TV işi” üzrə ümumilikdə doqquz nəfər barəsində hökm çıxarılıb.
