ASİMKOM Avropa İttifaqına müraciət edib
İyulun 1-də yayılan müraciətdə ASİMKOM Avropa İttifaqını Azərbaycanla əməkdaşlıq zamanı demokratiya, insan hüquqları və hüququn aliliyi prinsiplərinə xüsusi önəm verməyə çağırıb.
Sənəddə qeyd olunur ki, Rusiyanın Ukraynaya qarşı müharibəsi fonunda enerji təhlükəsizliyi və Orta Dəhliz layihəsi üzrə əməkdaşlıq Avropa üçün strateji əhəmiyyət daşısa da, tərəfdaşlıq yalnız iqtisadi maraqlarla məhdudlaşmamalıdır.
Müraciətdə bildirilir ki, uzunmüddətli və etibarlı əməkdaşlıq Avropa İttifaqının bəyan etdiyi demokratik dəyərlər və fundamental hüquqlar əsasında qurulmalıdır.
Azərbaycandakı vəziyyətlə bağlı iddialar
ASİMKOM sənədində son on ildə ölkədə demokratik institutların zəiflədiyi və idarəetmə sisteminin mərkəzləşdiyi iddia olunur.
Müraciətdə həmçinin müstəqil media qurumlarının, vətəndaş cəmiyyətinin və siyasi partiyaların fəaliyyətinin məhdudlaşdırıldığı, bir sıra media nümayəndələrinin həbs edildiyi qeyd edilir.
Bununla yanaşı, sənəddə Azərbaycanda 400-dən çox siyasi məhbusun olduğu iddia edilir.
Xaricdə təqiblərlə bağlı iddialar da yer alıb
Müraciətdə Azərbaycan hakimiyyətinin tənqidçilərinin xaricdə də təqiblərə məruz qaldığı iddia olunur.
Sənəddə müxtəlif ölkələrdə baş verdiyi bildirilən hadisələrə və Fransa məhkəməsinin bloger Məhəmməd Mirzəli ilə bağlı qərarına istinad edilir.
Bundan başqa, bəzi Azərbaycan şirkətləri və şəxslərinin Rusiyanın Avropa İttifaqının sanksiyalarından yayınmasına yardım etdiyi iddiası da sənəddə yer alır.
Polad Aslanov da müraciət ünvanlayıb
Hazırda həbsdə olan jurnalist Polad Aslanov da Ursula fon der Leyenə müraciət edərək səkkiz ildir həbsdə olduğunu bildirib.
O, jurnalistlərin, blogerlərin və hüquq müdafiəçilərinin peşə fəaliyyətinə görə azadlıqdan məhrum edildiyini iddia edərək, Avropa İttifaqını Bakı ilə münasibətlərdə insan hüquqları və siyasi məhbuslar məsələsini prioritet mövzu kimi gündəmə gətirməyə çağırıb.
Aslanov bildirib ki, iqtisadi əməkdaşlıq fundamental hüquq və azadlıqları kölgədə qoymamalıdır və azad medianın olmadığı şəraitdə dayanıqlı tərəfdaşlıqdan danışmaq mümkün deyil.
Ursula fon der Leyenin Bakı səfəri
Avropa Komissiyasının Prezidenti Ursula fon der Leyen iyulun 1-də işgüzar səfərlə Azərbaycana gəlib.
Səfər çərçivəsində Azərbaycan–Avropa İttifaqı münasibətləri, enerji və nəqliyyat sahəsində əməkdaşlığın genişləndirilməsi, Orta Dəhliz layihəsi və Azərbaycan-Ermənistan normallaşma prosesi üzrə müzakirələrin aparılması nəzərdə tutulur.
Səfər ərəfəsində bir sıra insan hüquqları təşkilatları, ictimai fəallar, siyasətçilər və jurnalistlər də Avropa Komissiyasının prezidentini Azərbaycan rəhbərliyi ilə görüşlərdə insan hüquqları və siyasi məhbuslar məsələsini gündəmə gətirməyə çağırıblar.
