“İddiaları təsdiqləyən heç bir sübut yoxdur”
İraq Silahlı Qüvvələrinin Ali Baş Komandanının sözçüsü Səbah ən-Numan ölkə ərazisindən, o cümlədən Səudiyyə Ərəbistanına qarşı hücumların həyata keçirildiyinə dair heç bir sübutun olmadığını bildirib.
Onun sözlərinə görə, bu cür iddialar səsləndirən tərəflərdən indiyədək heç bir konkret dəlil və ya sübut təqdim edilməyib.
“Xaricdən gələn heç bir pozuntunu qəbul etməyəcəyik”
Səbah ən-Numan vurğulayıb ki, İraq hökuməti ölkə daxilində qanunsuz silahlı fəaliyyətlərə imkan verməyəcək.
Eyni zamanda o bildirib ki, Bağdad dövlət sərhədlərindən kənardan İraqın suverenliyinə yönələn heç bir pozuntunu da qəbul etməyəcək.
Onun sözlərinə görə, hazırda təhlükəsizlik qurumları oxşar hadisələrin təkrarlanmaması və ölkənin suverenliyinin tam təmin edilməsi məqsədilə geniş təhlükəsizlik planı hazırlayır.
“Silah yalnız dövlətin nəzarətində olmalıdır”
Ali Baş Komandanın sözçüsü qeyd edib ki, İraqda təhlükəsizlik və silahlanma məsələlərinə yalnız rəsmi dövlət qurumları cavabdehdir.
O bildirib ki, ölkənin təhlükəsizliyinin qorunması yalnız rəsmi təhlükəsizlik qüvvələrinin səlahiyyətinə daxildir və dövlət nəzarətindən kənarda silahlı qüvvələrin fəaliyyətinə icazə verilməyəcək.
Baş nazirin “Həşd əş-Şəbi”yə səfərinə aydınlıq gətirildi
Səbah ən-Numan bildirib ki, İraqın Baş nazirinin “Həşd əş-Şəbi” qərargahına son səfəri bu qurumun ölkənin milli müdafiə sisteminin ayrılmaz hissəsi olduğunu göstərir.
Xatırladaq ki, İraq Silahlı Qüvvələrinin Ali Baş Komandanı daha əvvəl “Həşd əş-Şəbi”nin qərargahında olub, həlak olanların ailələrinə və yaralanan əməkdaşlara dəstəyin davam etdirilməsi barədə göstəriş verib.
İraq hökuməti bir daha bəyan edib ki, ölkə ərazisindən hücumların həyata keçirilməsi ilə bağlı səsləndirilən iddiaları təsdiqləyən hər hansı sübut indiyədək təqdim edilməyib.
