Evin altında yaşayan 200 kiloluq ayı: Kaliforniyada qeyri-adi hadisə
ABŞ-ın Kaliforniya ştatında yaşayan Ken Conson son həftələrdə evinin altında icazəsiz “qonaqlayan” gözlənilməz bir canlını çıxarmağa çalışır: təxminən 200 kilo çəkisi olan böyük bir qara ayı. Altadena bölgəsində yaşayan Conson əvvəlcə zibil qutularının aşması və bağda yerləşən kərpiclərin yerindən qopması ilə şübhələnib və buna görə də hərəkət sensorlu təhlükəsizlik kameraları quraşdırıb.
Kameraların qeydə aldığı görüntülər ayının təxminən 75 santimetrlik dar altlıq boşluğuna girib-çıxdığını göstərib. Ayının həm zibil qutularını eşələdiyi, həm də bağdakı kərpicləri sökdüyü anlar da kameralara düşüb.
Ayı iyundan bəri evin altında yaşayır
Conson bildirib ki, iyun ayında evin altındakı boşluğun dağıldığını görüb, lakin buna nəyin səbəb olduğunu yalnız ötən həftə aydınlaşdırıb. Keçən şənbə ayı qısa müddətlik çölə çıxıb, bazar gecəsi isə təxminən 20 dəqiqəlik yenidən görünərək hərəkətlənib.
“Bu ərazidə tez-tez vəhşi heyvanlar görürəm, amma evimin altındakı boşluğun belə dağıldığını heç vaxt müşahidə etməmişdim,” – deyən Conson, cümə günü kameranın batareyasını dəyişməyə çalışarkən ayının gurultulu səsi ilə üzləşdiyini əlavə edib. “Harada gizləndiyini bilməmək çox qorxuludur,” – deyə o bildirib.
Rəsmilərlə əlaqə hələ nəticə verməyib
Conson Kaliforniya Balıq və Vəhşi Təbiət Departamenti ilə əlaqə saxladığını, lakin yalnız onlayn ərizə formasına yönləndirildiyini və aydın cavab almadığını deyib. O, bazar ertəsi səhər rəsmi müraciətini tamamlayıb.
Ayının sakitləşdirilərək başqa əraziyə köçürüləcəyinə ümid etsə də, bunun real görünmədiyini söyləyən Conson hazırda vəziyyəti özünün həll etməli olacağını düşünür. O, ayını şirniyyatlarla evin altından çıxarmağa, daha sonra isə açıq sahəni bibər qazı hopdurulmuş qum torbaları ilə bağlamağa çalışacağını qeyd edib.
“Mətbəxin altından gələn səsləri eşidəndə çox gərgin oluram,” – deyə Conson vəziyyətin hələ də onu narahat etdiyini bildirib.
