Sızan sənəd: ABŞ-dan müttəfiqlərə “miqrasiyanı sərtləşdirin” təlimatı
“New York Times” qəzetinin əldə etdiyi diplomatik sənəd Vaşinqtonun Avropa, Kanada, Avstraliya və Yeni Zelandiyadakı səfirliklərinə yeni təlimatlar göndərdiyini üzə çıxarıb. Sənədə əsasən, ABŞ-ın dövlət katibi Marko Rubio diplomatlara məlum ölkələrə təzyiq göstərərək miqrasiyanın əksər formalarını məhdudlaşdırmağı tapşırıb.
21 noyabr tarixli bu diplomatik məktubda diplomatlara, miqrantların iştirakı iddia edilən cinayət hadisələrini xüsusi vurğulayaraq, ev sahibi hökumətləri sərt məhdudiyyətlər tətbiq etməyə sövq etmək göstərişi verilir.
Sənəddə deyilir ki, diplomatlar mütəmadi olaraq ev sahibi ölkələrin rəsmiləri ilə əlaqə saxlamalı, “miqrant mənşəli şəxslərlə əlaqəli zorakı cinayətlər və insan haqları pozuntuları” barədə Vaşinqtonun narahatlığını qabartmalıdır. Məktubda bu hadisələrin “ictimai təhlükəsizliyi və sosial birliyi sarsıtdığı” iddia olunur.
Məqsəd: siyasətləri dəyişmək və “suverenliyi qorumaq”
Sənəddə Vaşinqtonun məqsədi belə izah olunur: ev sahibi hökumətlərin miqrasiya siyasətlərini dəyişməyə sövq etmək, “milli suverenlik” adı altında sərt qaydalar tətbiq etməyə dəstək toplamaq və kütləvi miqrasiyanın sosial təsirlərinə dair narahatlıqları qabartmaq.
ABŞ Prezidenti Donald Tramp və administrasiyasının yüksək vəzifəli şəxsləri miqrasiyanı dəfələrlə “Qərb sivilizasiyasına təhdid” kimi təqdim edib. Tramp BMT-dəki çıxışında “qlobal miqrasiya gündəmini” tənqid etmişdi.
Tramp administrasiyasının əsas fiqurlarından olan Stiven Miller və vitse-prezident Cey Di Vens də oxşar mövqelər sərgiləyərək kütləvi miqrasiyanın ABŞ və Avropanın gələcəyi üçün təhlükə yaratdığını iddia ediblər.
Rubio və Landonun sərtləşdirilmiş xətti
Miqrant ailəsində böyüyən Marko Rubio illər ərzində mövqeyini dəyişərək daha sərt anti-miqrasiya xəttinin tərəfdarına çevrilib. O və müavini Kristofer Lando Dövlət Departamentinin Tramp administrasiyasının sərt siyasətlərini həyata keçirməsinə yardım göstərdiyi bildirilir.
Məsələn, administrasiya qaçqın qəbul kvotasını ciddi şəkildə azaldıb və mövcud 7 500 qaçqın yerindən bir çoxunun Cənubi Afrikadan olan ağdərili şəxslərə ayrıldığı bildirilir — “The New York Times” qeyd edir ki, bu qrup geniş miqyaslı təqibə məruz qalmır.
Diplomatik kanallar vasitəsilə miqrasiyanın qarşısını almaq
Sızan məktub diplomatlara 12 əsas danışıq mövzusu təqdim edir. Bunlardan biri hökumətlərə belə mesaj verməyi nəzərdə tutur:
-
“Miqrasiyanın mənfi sosial nəticələrindən, o cümlədən məcburi köç, cinsi zorakılıq və hüquq qaydasının pozulmasından vətəndaşlarınızı qoruyun.”
Başqa bir bənd isə “bəzi miqrant qrupları arasında radikal islamın yayılması” iddiasını qabardır və bunun antisemit və xristian əleyhinə insidentləri artırdığı iddia olunur — qəzet qeyd edir ki, sənəd bu iddiaları dəstəkləyən heç bir məlumat təqdim etmir.
Diplomatlara həmçinin ev sahibi hökumətlərin “kütləvi və ya qanunsuz miqrasiyaya dəstək verən halları” insan haqları hesabatlarına əlavə etmələri tapşırılıb.
“Qərb sivilizasiyasına təhdid” ritorikası güclənir
Vaşinqton son günlərdə rəsmi açıqlamalarda da miqrasiyanı “Qərb dünyanın varlığına təhdid” kimi təqdim edir. Bu yanaşma Avropadakı radikal sağ partiyaların ritorikası ilə oxşarlıq təşkil edir və bir çox analitiklər ABŞ-ın müttəfiqlərinə yönəlik diplomatik təzyiqlərinin yeni mərhələyə keçdiyini bildirirlər.
Dövlət Departamentinin rəsmisi açıqlayıb ki, yaxın günlərdə Latın Amerikası və digər bölgələrdəki ABŞ missiyalarına da miqrasiya ilə bağlı sərtləşdirilmiş təlimatlar göndəriləcək.
