Tramp: Zelenski sülh planını qəbul etməzsə müharibəni davam etdirmək məcburiyyətində qalacaq
ABŞ Prezidenti Donald Tramp Rusiyanın Ukraynaya qarşı müharibəsinə son qoymaq üçün təklif edilən 28 maddəlik sülh planı haqqında danışaraq Ukrayna tərəfinin bu sənədə necə reaksiya verəcəyinin həlledici olacağını bildirib. Tramp bu açıqlamanı Merilend ştatındakı Andrews Hərbi Hava Bazasında planlaşdırılan səfəri öncəsi Ağ Evdə jurnalistlərin suallarını cavablandırarkən verib.
Prezident ABŞ tərəfindən hazırlanan sülh planının məqsədinin müharibəni mümkün qədər qısa zamanda bitirmək olduğunu qeyd edib:
“Barışa nail olmaq istəyirəm. Bu müharibəni bitirməyə çalışırıq. Bir şəkildə buna son qoymalıyıq,” – deyə Tramp bildirib.
“Zelenski planı rədd etsə, kiçik ürəyi ilə döyüşməyə davam edə bilər”
Jurnalistlərin “Əgər Ukrayna Prezidenti Vladimir Zelenski planı qəbul etməsə nə olacaq?” sualını cavablandıran Tramp diqqət çəkən ifadələr işlədib:
“Zelenski planı rədd edərsə, kiçik ürəyi ilə var gücü ilə döyüşməyə davam edə bilər.”
Bu bəyanat həm ABŞ mediasında, həm də beynəlxalq ekspert dairələrində geniş müzakirəyə səbəb olub.
Tramp həmçinin sözügedən planın Ukraynaya son təklifi olub-olmadığına dair suala:
“Xeyr, bu son təklif deyil,” – cavabını verib.
AB: “Plan üzərində əlavə işlər görülməlidir”
G20 Liderlər Zirvəsi çərçivəsində Cənubi Afrikanın Yohannesburq şəhərində keçirilən görüşlər zamanı Avropa İttifaqı ölkələri ABŞ-ın təşəbbüsünü müsbət dəyərləndirsə də, planın bir sıra məqamlarının yenidən işlənməsi zərurətini vurğulayıb.
Birgə bəyanatda bildirilib ki:
-
28 maddəlik plan “ədalətli və davamlı sülh” üçün vacib elementlər daşıyır;
-
lakin sənəd “əlavə dəqiqləşdirmələr və üzərində iş tələb edir”;
-
sərhədlərin zorla dəyişdirilməsinin qəbulolunmaz olması yenidən təsdiqlənib;
-
Ukrayna Ordusuna təklif edilən məhdudiyyətlərin ölkəni gələcək hücumlara qarşı zəiflədə biləcəyi barədə narahatlıq mövcuddur.
Cenevrədə ABŞ–Ukrayna danışıqları
AB ölkələri sabah İsveçrənin Cenevrə şəhərində keçiriləcək ABŞ–Ukrayna görüşünə öz nümayəndələrini göndərməyə hazırlaşır. Danışıqlar zamanı Avropa tərəfinin ABŞ-ın sülh planına dəyişiklik təklifləri irəli sürəcəyi gözlənilir.
Rəsmi mənbələrə görə, Vaşinqton bu prosesdə həm Ukraynanın təhlükəsizliyini, həm də müharibənin mümkün qədər tez bitməsini prioritet hesab edir.
