Maduro: “Həqiqət və sülh üçün yol dialoqdan keçir”
Venesuela Prezidenti Nikolas Maduro ABŞ Prezidenti Donald Trampın son açıqlamalarına cavab verərək ölkəsinin sülh yolunu seçdiyini və heç bir hərbi təhdidin Venesuelanı qorxutmayacağını bildirib. Maduro vurğulayıb ki, “həqiqətə və sülhə aparan yol dialoqdan keçir və dialoqun, diplomatiyanın alternativi yoxdur”.
O deyib ki, Trampa yaxın bəzi dairələr onu Venesuelaya qarşı hərbi əməliyyatlara başlamağa sövq etməyə çalışır və bu addım Tramp üçün “siyasi karyerasının ən böyük səhvinə” çevrilə bilər.
Maduro Venesuelanın daim dialoqa açıq olduğunu qeyd edərək bildirib: “Kim dialoq istəyirsə, bizdə hər zaman sözünə sadiq, hörmətli və ölkəni idarə etmək təcrübəsinə malik insanlar tapacaq.”
ABŞ-ın hərbi ssenarilərinə istehza ilə cavab
Venesuela lideri Vaşinqtonun Venesuelaya qarşı hərbi və destabilizasiya planlarından bəhs edən açıqlamalarını tənqid edib. O, istehza ilə soruşub ki, ABŞ ölkədə hakimiyyətə kimi gətirməyi düşünür: “Yenidən Qvaidonu? Yoxsa ‘qadın Qvaidonu’ – Mariya Korina Maçadonu?”
Maduro əlavə edib ki, ölkə hazırda tam sakitlik içindədir və Venesuela ilə danışmaq istəyən ABŞ rəsmiləri ilə üz-üzə görüşməyə hər zaman hazırdır.
“Venesuelalıların 94 faizi müharibəyə ‘yox’ deyir”
Həftəlik televiziya proqramında çıxış edən Maduro ölkəsinin mövqeyinin sabit olduğunu vurğulayıb və bunu mərhum lider Uqo Çavezdən öyrəndiyini xatırladıb. O deyib ki, əgər Latın Amerikası sülh yolundan uzaqlaşarsa, regionu Vyetnam, Əfqanıstan, İraq və Liviyada yaşananlara bənzər “sonsuz müharibələr” gözləyə bilər.
Maduronun sözlərinə görə, ABŞ mediasında yayılan bəzi materiallar Trampı “yanlış yola sürükləməyə” xidmət edir və bu kampaniyanı həm onun rəqibləri, həm də “Trampdan sonrakı dövr üçün planlar quran yaxın əhatəsi” dəstəkləyir.
Prezident bildirib ki, son 16 həftə ərzində ölkədə “məzmunca misilsiz birlik” formalaşıb. Rəqəmlərə görə, venesuelalıların 94 faizi hərbi müdaxilə təhlükəsini rədd edir, 90 faizdən çoxu isə Xuan Qvaido, Mariya Korina Maçado və Leopoldo Lopes kimi siyasətçiləri dəstəkləmir. Bundan başqa, əhalinin 80 faizi ordu və xalq milisini, 70 faizi isə hökuməti dəstəklədiyini bildirir.
Latın Amerikasında hərbi bazalara etiraz artır
Maduro həmçinin Ekvador Prezidenti Daniyel Nuboanın xarici hərbi bazalar və konstitusiya ilə bağlı keçirdiyi referendumda məğlub olmasını “Ekvador xalqının və bütövlükdə Latın Amerikanın qələbəsi” adlandırıb. O dedi ki, region ölkələri artıq “ABŞ-a bağlı, müharibə tərəfdarı kolonial hərbi bazalara” aydın şəkildə etiraz edir.
Digər tərəfdən, ABŞ Prezidenti Donald Tramp da ötən günlərdə açıqlama verərək Venesuela ilə danışıqların mümkünlüyünü istisna etməyib. Onun sözlərinə görə, Karib hövzəsində ABŞ hərbi varlığının artdığı bir dövrdə Venesuela danışıqlar masasına əyləşməyə hazır görünür.
