Çin və Aİ-dən əməkdaşlıq mesajı
Çinin Baş naziri Li Çyanq və Avropa Komissiyasının sədri Ursula fon der Lyayen Nyu-Yorkda BMT Baş Assambleyasının iclası çərçivəsində görüş keçirib. “Reuters”in məlumatına görə, tərəflər ABŞ-ın tətbiq etdiyi gömrük rüsumları və artan ticarət gərginliyi fonunda əməkdaşlığın vacibliyini vurğulayıblar.
Fon der Lyayen sosial şəbəkə “X” platformasında yayımladığı açıqlamada Çinin ixrac məhdudiyyətləri, bazarlara çıxış problemləri və istehsal gücü profisitini müzakirə etdiklərini bildirib. O, Çinin “qarşılıqlı anlaşma ruhu ilə dialoqa hazır olmasını” müsbət qiymətləndirib.
Ticarət mübahisələri və araşdırmalar
Son iki ildə Avropa İttifaqı ilə Çin arasında münasibətlər bir neçə dəfə gərginləşib. Avropa tərəfi Çində istehsal edilən elektrik avtomobillərinə dövlət dəstəyi ilə bağlı araşdırma aparmış, Pekin isə cavab olaraq Avropa məhsullarına – o cümlədən brendi və süd məhsullarına dair araşdırmalara başlamışdı.
Li Çyanqdan açıq bazar çağırışı
Çin Xarici İşlər Nazirliyinin açıqlamasına görə, Li Çyanq görüşdə Aİ ilə diplomatik münasibətlərin əsas prinsiplərinə sadiq qalmağın vacibliyini vurğulayıb. O bildirib ki, Avropa İttifaqı ticarət və investisiya bazarlarını açıq saxlamalıdır.
Çin baş naziri əlavə edib:
“Çin və Avropa İttifaqı əsas qlobal güclər kimi məsuliyyət göstərməli və strateji müstəqilliklərini qorumalıdır.”
Ukrayna məsələsi və diplomatiya çağırışı
Fon der Lyayen həmçinin Çindən Rusiyaya təsir göstərərək Ukraynadakı müharibənin dayandırılmasına yardım etməsini istəyib. Diplomatların fikrincə, Pekinin iqtisadi gücü və Çin lideri Si Cinpinin Rusiya prezidenti Vladimir Putin üzərindəki təsiri Avropanın strateji hesablamalarında mühüm yer tutur.
Görüşün sonunda Ursula fon der Lyayen diplomatiyanın vaxtının çatdığını bildirib və atılacaq hər hansı addımın “dünyaya güclü mesaj verəcəyini” qeyd edib.
